…E feria di konsumidó di mas grandi na Hulanda…
WILLEMSTAD- 11 di yanüari 2018 – E aña aki tambe Ofisina di Turismo di Kòrsou (CTB) kompañá pa diferente partner den sektor privá ta partisipá na Vakantiebeurs kual ta tuma lugá na Jaarbeurs na Utrecht, Hulanda. Vakantiebeurs 2018 ta tuma lugá di 9 pa 14 di yanüari 2018 i ta sigur un di e eventonan kaminda CTB tur aña di nobo ta presente pa por promoshoná nos pais komo e destinashon turístiko number 1 den Karibe. E aña aki tambe e feria ta konta ku un partisipashon di riba aproksimadamente 100 mil bishitante. E bishitantenan aki tur tei pa laga nan mes keda inspirá ku ideanan pa nan próksimo vakashon. Meskos ku añanan anterior ta hopi ta esnan ku riba e promé dianan ya kaba a bishitá e stènt di Kòrsou.
Tur aña di nobo CTB ta organisá durante henter e siman un evento spesialmente pa atraé mas bishitante na e stènt di Kòrsou. E aña aki ta laga e bishitantenan tèst nan konosementu di papiamentu dor di mustra nan algun video di personanan lokal papiando papiamentu i nan por skohe for di 4 opshon kiko e persona lo por ta bisando. E ganadornan por gana entre otro: un eksperensia ku e Seabob, un tour na Landhuis Chobolobo, un trep pa wak bahada di solo riba boto ku Pelican Express, un trep pa Klein Curaçao ku BlueFinn Charters i hopi mas. E premio grandi ta un ticket pa 2 persona di 8 dia inkluyendo akomodashon na Livingstone Jan Thiel Resort.
Banda di e stènt di Kòrsou tin un teater kaminda Kòrsou ta dunando presentashon di 1 ora tur dia pa asina atraé e bishitantenan di e feria pa skohe pa Kòrsou. E presentashonnan ta keda duná pa e aktor hóben, Anton de Bies ku durante di su presentashon ta kompartí ku esnan presente un lista di e aktividatnan ku ta riba su lista pa e hasi ora e bai kas esta Kòrsou bèk. E diferente partnernan privá tambe ta duna un bista di tur loke nan tin di ofresé. Por bisa ku e aña aki tambe e stènt di Kòrsou ta bon ekipá ku informashon tokante di nos dushi pais. Riba promé dia di e feria esta 9 di yanüari, CTB a organisá ademas un kòktel spesialmente pa duna rekonosementu na e partnernan mas balioso.
Un danki spesial ta bai na e partnernan for di sektor privá ku a forma parti e aña aki di e tim di Kòrsou: CHATA, Papagayo Curaçao, Livingstone Jan Thiel Resort, ‘t Klooster Boutique Hotel, Quint’s Travelers Inn, Acoya Curaçao Resorts, Villas & Spa, Kontiki Beach Resort, Oasis Coral Estate, Dolphin Suites Curaçao, Scuba Lodge & Ocean Suits, Dolphin Academy Curaçao, Hilton Curaçao, Sunscape Curaçao Resort, Spa & Casino, Hato Caves i BlueFinn Charters Curaçao.
