CTB ku akshon di merkadeo na Brazil durante lansamentu di Samsung Galaxy S8 i Galaxy S8+

May 5, 2017

Kòrsou tabata pionero den kreashon di ‘cross-promotion’ ku e gigante di teknologia koreano…
WILLEMSTAD – 4 di mei 2017– Den luna di aprel último, Kòrsou a debutá na Brazil ku un plan di merkadeo kreativo i pionero durante di lansamentu di e modelonan di mas nobo di Samsung, e Galaxy S8 i e Galaxy S8+.

Kòrsou a forma parti di e evento ku a tuma lugá den Sala São Paulo na siudat di São Paulo. E evento den kual a lansa e modelonan di mas nobo di e gigante di teknologia koreano a konta ku 700 invitado, inkluyendo artista, deportista i personahenan públiko manera e artistanan, Taís Araújo, Sophia Abraão i Mel Fronckowiak, tambe hungadónan di vòli Bruninho i Sergio Escadinha, i presentadornan di televishon Pedro Andrade i Titi Muller.

E aktividat promoshonal realisá pa Ofisina di Turismo di Kòrsou (CTB) a inkluí un rifa di un biahe pa Kòrsou entre e 700 invitadonan presente. E marka Kòrsou a risibí promoshon tambe durante di e henter e evento na e stènt di e produkto Samsung Pay. Ehekutivo di merkadeo pa Suramérika di CTB, Muryad de Bruin tabata na Brazil pa lansamentu di e akshon promoshonal kaminda ku el a komentá tokante di e strategianan di merkadeo pa ku e merkado aki. “Brazil ta un pais esensial den nos trabou di promoshon turístiko i pa desaroyá un plan di promoshon konhuntamente ku un marka di renombre mundial manera Samsung lo yuda sigur pa elevá e persepshon di e turista brasilero aún mas tantu pa nos isla, i asina suprayá e potensial ku nos tin komo destinashon”.

E akshon promoshonal huntu ku Samsung tambe a konta ku apoyo di Copa Airlines ku a ofresé e pasashinan den business class na e ganador di e sorteo ku pronto lo ta di bishita aki pa asina konosé Kòrsou su enkantonan i atrakshonnan turístiko. Den transkurso di e luna aki lo kontinuá ku e kolaborashon promoshonal entre Kòrsou i Samsung ku un kampaña aún mas fuerte ku lo keda promové rònt Brazil, esaki sigur lo duna mas realse na Kòrsou komo destinashon turístiko.

Most recent