WILLEMSTAD – 3 di aprel 2017 – Di 12 pa 17 di aprel 2017 ta tuma lugá Operashon Siman Santu. Pa di 7 aña konsekutivo Ofisina di Turismo di Kòrsou (CTB) a uni forsa ku diferente entidat públiko i privá pa ehekutá un biaha mas Operashon Siman Santu. Meta di Operashon Siman Santu ta pa optimalisá e parti di limpiesa i seguridat durante di e temporada di Siman Santu. Esaki ta na benefisio di nos bishitantenan for di eksterior i nos pueblo lokal. E tim enkargá ku e operashon ta konsistí di representantenan di: Kuerpo Polisial Kòrsou, Politur, GMN, AVB, THZ, Selikor, Warda Kosta, Citro, Ambulans, Brantwer, Rode Kruis, Stichting Slachtofferhulp Curaçao, Janthiel Security, Hawk Eye Security i CTB.
CTB a informá ku den kuadro di Operashon Siman Santu a apuntá algun playa públiko i atrakshon turístiko na unda lo bai optimalisá servisionan di limpiesa, servisionan di tualèt portátil i seguridat. Esakinan ta entre otro: Caracasbaai aria di rekreashon i mirador, Boca Simon, Pier di Mari Pampoen, Daaibooi, Sta. Cruz, Lagun, Jeremi, Kenepa Grandi, Kenepa Chikí, Playa Fòrti, Playa Kalki, Playa Piskadó, Vlakte di San Pedro, Shete Boka, Watamula, Rooi Rincon i Ascencion.
Pa e parti di Kuerpo Polisial e siguiente medidanan di prevenshon ta vigente: Shofùrnan mester sòru pa tur dokumentu di nan vehíkulo ta na òrdu i e vehíkulo mes mester ta den un bon estado tékniko; lo tin sufisiente unidat tantu uniformá komo na sivil ku lo kontrolá na e diferente playanan pero tambe otro sitionan turístiko; un petishon pa no laga kosnan di balor den outo atras; stashoná vehíkulo na sitionan ku tin sufisiente iluminashon; sigurá bo mes ku bo vehíkulo ta di lòk i ku tur e glasnan ta será promé ku bandoná e vehíkulo. Polis lo traha den estrecho koperashon ku kompanianan di seguridat na playanan i tambe otro instanshanan ku ta duna yudansa di emergensia pa garantisá un yudansa profeshonal rápido i efektivo. Agentenan di Politur tambe lo forma parti di Operashon Siman Santu. Brantwer lo ta disponibel pa den kaso ku esaki ta nesesario. Lo bai tin kòntròl di tráfiko na diferente sitio. Ta bon pa anunsiá tambe ku den kaso ku e aria di Caracasbaai tin hopi vehíkulo i ta opstakulisá e tráfiko motorisá, polis por tuma medidanan nesesario pa garantisá e fluho rápido di tráfiko. Pa kasonan no urgente por yama 917 i den kaso di urgensia por yama e number 911.
Warda Kosta lo tene kòntròl riba botonan pa chèk si tur dokumentonan i rekisitonan di seguridat ta abordo i na òrdu: entre otro vèst, flair i aparato pa paga kandela. Lo tin kòntròlnan riba komportashon di botonan i tambe sea-doo sigur kaminda hende ta landa. Tambe lo kontrolá riba uso di alkohòl. Den kaso di emergensia por yama 913. Ademas Warda Kosta konhuntamente ku CITRO lo atendé kasonan di reskate riba laman. Puntonan importante: tene kuenta ku kantidat di pasahero ku ta permití den boto, mester tin aparatonan pa komuniká abordo; Radio VHF/ telefòn selular, ku bateria kargá i tambe flairnan pa por indiká bo posishon den kaso di búskeda.
Ministerio di Salubridat, Medio Ambiente i Naturalesa a pone énfasis riba vários punto importante ku tin di haber ku entre otro salú di hende, higiena i kuminda, konsumo personalòf pa benta na públiko, seguridat personal riba playa i kuido di nos playanan. Konforme lei tur persona ku ta prepará i bende alimento i kos di bebe ku públiko mester tin nan karchi di kùr bálido serka nan. Solo i kalor por tin influensia grandi riba salú di hende p’esei ta importante pa entre otro bebe sufisiente awa i hunta krema ku faktor haltu di protekshon kontra solo. Lo sòru pa nos playanan ta limpia i ta pidi pa tene esakinan limpi tambe p’esei ta bai pone mas kònteiner di sushi na e diferente playanan pa e periodo aki. Ta hasi un petishon na personanan ku ta bai grill pa tene kuenta unda ta grill i pa ora kaba, basha e karbon den e barínan di heru ku ta indiká “KARBON AKI” i no riba playa ni otro kaminda. Fundashon Kuido di Ambulans lo tin unidat ta kore na e diferente playanan i atrakshonnan turístiko. Den kaso di urgensia no akudí na e pòst di Ambulans pero yama 912.
Pa loke ta trata e parti di limpiesa Selikor a anunsiá ku lo amplia e skema di rekohé shushi na e diferente playanan ku ta forma parti di Operashon Siman Santu. Na e playanan kaminda tin tualèt portátil e personal di Selikor lo sòru pa limpia i desinfektá esakinan ku regularidat. Ta hasi un petishon na esnan ku ta kedando na un wikènthùis durante di Siman Santu pa no bai benta nan sakunan di shushi den e kònteinernan ku tin ubiká na e playanan mirando ku e dianan ei lo tin hopi usuario na playanan. Konsekuentemente e kònteinernan lo no bai ta sufisiente. Konforme e skema normal Selikor lo pasa rekohé e shushinan di wikènthùis riba djaluna i spesialmente pa e temporada di Siman Santu a pone un dia èkstra kual lo ta riba e djasabra. Por depositá shushi tambe na Landfill Malpais. Number di pikèt pa Selikor lo ta: 566-1635. E aña aki tambe e lema ta keda: Bin ku bo saku, bai ku bo shushi.
