WILLEMSTAD- 18 di yanüari 2017- Ku nos playanan ta un beyesa, ta algu ku nos tur sá i ta orguyoso di dje. Pero pa ta figurá entre e 25 playanan di mas bunita na mundu mester sirbi komo motivashon pa nos siguí preservá i kuida kada un di nos playanan. Kòrsou su Playa Kenepa Grandi ta menshoná entre e mihónan di mundu i ta gana playanan renombrá di Hawaii, Tahiti, Gresia i Brazil.
E portal di internèt Caribbean 360 a hasi menshon di e mihó playanan na mundu. For di un lista di 25 playa, huradonan di Passport Magazine a rekonosé Playa Kenepa Grandi na di 8 lugá. Den su splikashon tokante e motibu pa kua a skohe pa Playa Kenepa Grandi, e editor di Passport Magazine, sr. Rich Rubin ta konsentrá mas riba e beyesa natural di e kosta na parti nort wèst di Kòrsou. Únikamente 2 playa riba e lista ta bini di e region di Karibe i Kòrsou ta na e di 8 lugá i di 7 lugá a bai pa e playa Varadero na Cuba. Playanan di Kòrsou i sitionan di buseo ta parti importante di e produkto turístiko ku Ofisina di Turismo di Kòrsou (CTB) ta usa na momentu di hasi promoshon pa nos pais. Pabien Kòrsou!
