WILLEMSTAD- 21 di mart 2015:- ‘Curaçao International Drag Fest 2015’ ta den full preparashon i e interes tantu lokal komo internashonal ta grandi. Ofisina di Turismo di Kòrsou (CTB) huntu ku Fundashon Autosport Curaçao (FAC) a tene un enkuentro ku prensa i e fanátikonan di ‘drag race’ na Aruba pa informánan i invitánan ofisialmente pa partisipá na ‘Curaçao International Drag Fest 2015’, CTB ta apoyá e evento aki ku promoshon den su merkadonan internashonal spesialmente e área di Karibe.
‘Curaçao International Drag Fest’ ta un evento riba nivel internashonal pa loke ta trata e deporte di ‘drag race’ aki na Kòrsou. CTB ku su meta prinsipal ta promové Kòrsou den eksterior, a uni ku FAC pa asina promoshoná ‘Curaçao International Drag Fest 2015’. Un evento manera esaki ta hala atenshon di hopi hende den eksterior ku ta gusta e deporte di velosidat. Aruba ta un di nos merkadonan importante den Karibe i ta un isla ku semper ta reakshoná positivo pa loke ta trata aktividat aki na Kòrsou i sigur ‘drag race’. Motibu pa kual CTB huntu FAC a tene un enkuentro ku prensa i e fanátikonan, den un estilo masha ameno a interkambiá ku e ‘drag fans’ di Aruba i asina fortifiká e lasonan entre e islanan. E enkuentro tabata bon bishita i atenshon pa ‘Curaçao International Drag Fest 2015’ ta grandi di parti nos hermana isla Aruba.
‘Curaçao International Drag Fest’ lo ta dianan 28 di aprel: Auto Show na Brionplein – 29 di aprel: ‘Test & Tune Night’, 30 aprel, 1 i 2 di mei: dianan di kareda. Paisnan ku ya a konfirmá nan partisipashon ta Puerto Rico, Repúblika Dominikana, Venezuela, Aruba i naturalmente Kòrsou mes.
Un danki special ta bai na InselAir,Trupial Inn Hotel & Casino i Clarion Hotel & Suites Curaçao ku tambe a duna nan aporte na e rueda di prensa.Komunidat di Kòrsou tambe ta keda kordialmente invitá pa bishita e aktividatnan di ‘Curaçao International Drag Fest 2015’ i asina kompartí ku nos bishitantenan internashonal. Pa mas informashon di ‘Curaçao International Drag Fest 2015’ por bishita e página web di FAC ku ta www.curacaodrag.com i http://bit.ly/CuracaoRaceway i via di CTB su medionan di komunikashon: www.curacao.com i www.facebook.com/curacaotb.
