…Ban sigui vota pa Kòrsou riba wèpsait di USA Today…
WILLEMSTAD- 27 di novèmber 2014 – Un biaha mas Kòrsou ta keda selektá den kompetensia ‘10 Best Readers Choice Travel Award’. E biaha aki den e kategoria di ‘Best Romantic Caribbean Island’. E wèpsait di USA TODAY ta esun ku ta promové e kompetensia i ta brinda tur partisipante e oportunidat di vota pa nan destinashon mas romántiko den Karibe.
Ofisina di Turismo di Kòrsou (CTB) ta ekstendé un invitashon na komunidat di Kòrsou pa vota pa Kòrsou i asina posishoná nos isla komo e destinashon ‘romántiko’ number un den Karibe. Ta bon pa menshoná ku un persona por vota únikamente 1 bes pa dia. Pa depositá bo voto bishitá e wèpsait. Aworakí Kòrsou ta na posishon number 2 pues nos mester sigui vota pa nos por yega puesto number 1. Kòrda kompartí e link ku otronan. Oportunidat di voto ta te ku djaluna 8 di desèmber 2014. E ganador lo ser anunsiá despues riba e wèpsait di USA TODAY. CTB ta invitá un i tur pa bishitá e wèpsait di USA TODAY i ban vota pa Kòrsou!
