WILLEMSTAD – 16 di novèmber 2026 –Ofisina di Turismo di Kòrsou (CTB), huntu ku sektor privá a organisá un seri di evento na Colombia, den e siudatnan Bogotá, Medellín i Barranquilla. E meta tabata pa kompartí informashon aktualisá tokante Kòrsou su produkto turístiko, pa asina mayoristanan, agentenan di biahe i sosionan komersial ta bon informá i prepará pa promové Kòrsou na bishitantenan prospekto. Na Bogotá i Medellín, CTB a organisá un roadshow di Kòrsou ku seshonnan edukashonal, ku a atraé mas o ménos 225 partisipante. Na Barranquilla, un almuerso edukashonal a risibí 70 partisipante, miéntras ku un sena kombiná ku presentashon a reuní 88 sosio komersial.
Durante e roadshow, e delegashon di Kòrsou, ku tabata konsistí di representantenan di hotèl i operadornan di tour, kada unu tabatin nan mesa kaminda e partisipantenan por a siña mas tokante nan produkto i servisio, interaktuá direktamente ku e representantenan i hasi pregunta. CTB a entregá tambe plakat di rekonosementu na Avianca, Wingo i Copa Airlines komo muestra di apresio pa nan bon kolaborashon durante e añanan. E almuersonan edukashonal na tur tres siudat a inkluí presentashon i rifa di diferente premio atraktivo. E sena na Barranquilla tabata enfoká spesífikamente riba kompanianan ku por trese gruponan di MICE na Kòrsou. Esta gruponan ku ta biaha pa motibu di trabou pa tene nan reunion, konferensia òf evento na un destinashon.
CTB ta gradisí tur e partnernan di sektor privá ku a forma parti di e delegashon di Kòrsou: Sandals Curaçao, Renaissance Wind Creek Curaçao Resort, Parasasa Hotel, Hyatt Collection Curaçao (Sunscape, Dreams, Zoëtry, El Mare) Corendon Hotels Curaçao (Mangrove, The Rif, Ritz), Kunuku Aqua Resort, Sonesta Livingstone, Curaçao Marriott, The Pyrmont Curaçao, Courtyard by Marriott, Harbor Hotel, Dolphin Academy, Rumba Tours, Fiesta Tours i Curaçao Vacations.













