WILLEMSTAD – 29 di sèptèmber 2026 – Ofisina di Turismo di Kòrsou (CTB) resientemente a organisá dos seshon pa splika i pasa riba e material di turismo ku a keda diseñá spesialmente pa grupo 6 di skol di fundeshi i pa skolnan di enseñansa spesial. E material ta konsistí di videonan edukativo di turismo, un map di guia pa e maestro, un buki di tarea i un pasport di turismo pa e alumno. E promé seshon tabata dirigí riba maestronan di enseñansa spesial i e di dos seshon tabata pa maestronan di skol di fundeshi grupo 6. E dos seshonnan huntu a konta ku partisipashon di 62 maestro di e diferente direktivanan di skol.
Durante apertura di e promé seshon a hiba palabra sr. Guido Rojer den representashon di Minister Middelhof i direktor di CTB, sr. Muryad de Bruin a habri e di dos seshon. E aña aki ta marka 4 aña ku CTB, den estrecho kolaborashon ku Ministerio di Enseñansa, a kuminsá introdusí turismo den skolnan, inisiando na aña 2022 ku grupo 5 di skol di fundeshi i skol spesial. Den grupo 6, e alumnonan lo trata e siguiente temanan: Trabounan den industria di turismo, Importansia di tene Kòrsou limpi, Merkadeo i bon komportashon, Kultura i Turismo, i un rekapitulashon di e material ku e alumnonan a trata den grupo 5. Turismo ta mas ku solamente risibí turista, e ta konektá ku nos kultura, nos ekonomia i nos bida diario. E temanan aki ta reflehá den e materialnan ku a keda desaroyá pa grupo 6.
CTB ta kontentu ku e partisipashon aktivo di e maestronan durante e seshonnan. Maestronan tin un ròl importante den yuda e siguiente generashon komprondé i balorá e kontribushon di turismo na ekonomia di Kòrsou. Ku e material desaroyá pa CTB, e maestronan awor tin un instrumentu práktiko i atraktivo pa trese turismo mas serka di e alumnonan.
