WILLEMSTAD- 28 di ougùstùs 2026 – Kòrsou ta sigui konsolidá su posishon komo un di e destinashonnan preferí pa biaheronan prosedente di Argentina. Den e kuadro aki, Minister di Desaroyo Ekonómiko, sr. Roderick Middelhof i Ofisina di Turismo di Kòrsou (CTB) den kolaborashon ku Curaçao Airport Holding (CAH), Curaçao Airport Partners (CAP) i Curaçao Hospitality & Tourism Association (CHATA) ta selebrá e anunsio di Aerolíneas Argentinas, indikando ku entrante 2 di yanüari 2027 pa promé biaha den nan historia e aerolínea lo inisiá un ruta direkto entre Buenos Aires i Kòrsou. E servisio lo konta ku un frekuensia di 4 biaha pa siman, 2 lo ta nònstòp i 2 lo pasa via Aruba. E buelonan lo kontinuá te ku 29 di mart 2027.
Skema di buelo:
AR1376 (via Aruba)
Ruta: Buenos Aires (EZE) – Aruba (AUA) – Curaçao (CUR)
Dianan: Djaluna i Djaweps
AR1378 (nònstòp)
Buenos Aires (EZE) – Curaçao (CUR)
Djárason i Djasabra
Argentina ta un di e merkadonan ku a registrá mas kresementu pa Kòrsou e último añanan. Entre yanüari pa yüli 2026 un total di 23.924 turista argentino a keda risibí kual ta un kresementu di 79% kompará ku e mesun periodo na aña 2025. Na luna di yüli, un total di 4.862 turista argentino a bishitá Kòrsou kompará ku 2.885 risibí na yüli 2025 kual ta un kresementu di 69%. E servisio nobo di Aerolíneas Argentinas ta representá un oportunidat pa mas turista for di Argentina i region di Sur Amérika bin eksperensiá Kòrsou su produkto turístiko riku. For di un variedat amplio di akomodashon te na diferente atrakshon turístiko, playanan bunita, deportenan akuátiko, kultura vibrante, eventonan i mas ku tur kos e kaluroso hospitalidat di e habitantenan di Kòrsou. Na mes momentu, e ruta nobo aki lo nifiká mas opshon di biahe pa pueblo di Kòrsou, tantu pa esnan ku ta biaha pa vakashon òf pa hasi negoshi.
Minister Middelhof, CTB, CAH, CAP i CHATA ta yama bon biní na e ekspanshon importante aki den konektividat aéreo di Kòrsou i ta mira ku entusiasmo e oportunidatnan ku e ruta nobo aki lo krea pa turismo, biahe i relashonnan ekonómiko entre Kòrsou i Argentina.
