WILLEMSTAD – 20 di ougùstùs 2026 – Pa di dos aña konsekutivo, Carnival Corporation a invitá studiantenan di Kòrsou na su Educational Student Ship Visit, e biaha aki abordo di Carnival Horizon. E programa a inkluí un seshon edukashonal, un pènel tokante kareranan den industria krusero, un tour abordo di e barku i almuerso abordo. Ofisina di Turismo di Kòrsou (CTB) a kordiná partisipashon di 21 studiante di Universidat di Kòrsou (UoC) i College of the Dutch Caribbean (CDC) na e bishita edukashonal aki. Pa medio di e inisiativa aki, e studiantenan a haña informashon balioso tokante Carnival Corporation, su operashonnan i e industria krusero en general.
E studiantenan ku a keda selektá pa partisipá e aña aki ta studiantenan ku ya kaba ta hasiendo un estudio den turismo i hospitalidat, loke ta hasi e eksperensia aki partikularmente relevante pa nan desaroyo akadémiko i profeshonal. E studiantenan di UoC ku a partisipá ta esnan ku ta bai drenta awor nan di dos aña di e estudio, International Hospitality & Tourism Management. E partisipantenan di CDC ta studiantenan di promé, di dos i di tres aña, ku ta siguiendo e programa Tourism Management òf Tourism and Recreation Supervisor. Durante e seshon di pregunta i kontesta, e studiantenan a interkambiá ku profeshonalnan di e industria pa haña mas konosementu tokante e industria krusero i e oportunidatnan di karera den e industria aki.
Ademas, durante e bishita a tuma lugá tambe un reunion stratégiko entre e tim di Carnival Corporation, representá pa sra. Sarah Beth Reno, Chief Operations Officer i sra. Marie McKenzie, Senior Vice President, Government & Destination Affairs i di parti di Kòrsou, sra. Zulaika Mook, Sector Director Economic Development and Innovation na Ministerio di Desaroyo Ekonómiko, direktor di CTB, sr. Muryad de Bruin i direktor di Curaçao Ports Authority, sr. Humberto de Castro.
E bishita abordo di Carnival Horizon a brinda e studiantenan partisipante un eksperensiá edukativo balioso. CTB ta ekspresá su gratitut na Carnival Corporation pa e kolaborashon kontinuo i kompromiso pa sigui krea oportunidatnan edukativo pa e studiantenan di Kòrsou.
