WILLEMSTAD – 12 di ougùstùs 2026 – Pa di tres aña konsekutivo, Ofisina di Turismo di Kòrsou (CTB) a organisá Youth Tourism Experience Program. Meta di e programa ta pa hóbennan entre 15 i 17 aña di edat sera konosí ku e industria di turismo i hospitalidat durante un fakansi job di 3 siman. E edishon di e aña aki a keda organisá den estrecho kolaborashon ku 18 kompania den industria di turismo i a tuma lugá di 20 di yüli pa 8 di ougùstùs 2026. E programa a keda klousurá ku un seremonia ameno kaminda Andre Rojer, Manager di departamentu di Produkto na CTB, a hasi entrega di sertifikado na e 40 hóbennan partisipante komo muestra di rekonosementu ku nan a kompletá e programa ku éksito.
E hóbennan ta di diferente skol i nivel di edukashon inkluyendo, AGO, VSBO, SBO, HAVO i VWO. Promé ku inisio di e fakansi job, e hóbennan a sigui 3 dia di workshop, komo preparashon pa nan eksperensia den industria di turismo. Tópikonan a inkluí: E Produkto Turístiko di Kòrsou, Eksperensia di kliente, Branding personal, Komportashon profeshonal, Maneho di sèn i Komunikashon. Tambe e hóbennan a partisipá na un eskurshon kaminda nan a bishitá diferente sitio pa eksperensiá e naturalesa, historia i kultura di Kòrsou.
E kompanianan ku a partisipá ta: Avila Beach Hotel, Blue Bay Resort Curaçao, Christoffel National Park, Coral Estate Luxury Resort, Mangrove Beach Corendon Curaçao, The Rif at Mangrove Beach Corendon Curaçao, Curaçao Ports Authority, Curaçao Sea Aquarium, Museum Association Curaçao, Curaloe, FBTT, LionsDive Beach Resort Curaçao, Curaçao Rif Mangrove Park, Curaçao Marriott Beach Resort, Courtyard by Marriott Curaçao, Papagayo Beach Resort Curaçao, Renaissance Wind Creek Curaçao Resort, Chichi Garden i CTB mes. CTB ta gradisí tur e kompanianan ku a partisipá dunando e hóbennan e oportunidat balioso pa por desaroyá nan abilidatnan. Pa medio di inisiativanan manera Youth Tourism Experience Program, CTB ta sigui stimulá hóbennan pa eksplorá e industria di turismo i hospitalidat miéntras nan ta haña eksperensia práktiko balioso.
