WILLEMSTAD – 23 di mart 2026 – Ofisina di Turismo di Kòrsou (CTB) huntu ku 22 partnernan di sektor privá a partisipá na e di 45 edishon di ‘Vitrina Turística ANATO’ na Bogotá, Colombia. Ta trata aki di un di e ferianan turístiko di mas grandi den Latino Amérika. E aña aki e evento di 3 dia a atraé 35 destinashon i a konta ku partisipashon di riba 56 mil profeshonal den turismo. Kòrsou su partisipashon na ANATO ta parti di un vishon stratégiko dirigí riba fortalesé relashon ku partnernan importante na Colombia, inkluyendo, aerolíneanan, operadornan di tour, agentenan di biahe, mayoristanan i representantenan di media.
E aña aki, Kòrsou tabatin un stènt kolorido den e área prinsipal lokual a resultá den mas bishita di profeshonalnan di turismo na e stènt. E stènt tabata den e tema di “Blue Wave” komo parti di e entusiasmo rondó di Kopa Mundial di Futbòl 2026. Ademas, Brenton Balentien ‘Captain Blue Face’ tambe tabatei presente pa trese e energia i krea un konekshon dibertido ku e bishitantenan na e stènt di Kòrsou. Na mes momentu, a hasi uso di e oportunidat pa motivá e partnernan na Colombia pa invitá nan klientenan pa bishitá Kòrsou. Durante e 3 dianan di e evento, e tim di Kòrsou a tene diferente reunion stratégiko ku aerolíneanan, operadornan di tour, agentenan di biahe, mayoristanan i media. Pa e partnernan di sektor privá, e reunionnan aki a sòru pa mas oportunidat pa fortifiká e kolaborashon ku partnernan di Colombia.
Un danki ta bai na e partnernan di sektor privá ku a forma parti di e tim di Kòrsou durante ANATO 2026; Curaçao Hospitality & Tourism Association, Curaçao Airport Partners, Hyatt Inclusive Collection, Papagayo Curaçao, Avila Beach Hotel i TUI Blue Curaçao, Renaissance Wind Creek Curaçao Resort, Van der Valk Kontiki Beach Resort Curaçao, Mangrove Beach Corendon Curaçao All-Inclusive Resort, Curio Collection by Hilton, DeLynne Boutique Hotel Curaçao, Coral Estate Luxury Resort, Curaçao Marriott Beach Resort, LionsDive Beach Resort Curaçao, ACOYA Curaçao Resort, Villas & Spa, Tourism Management Curaçao, Curaçao Vacation Tours, Fiesta Tours Curaçao, BlueFinn Charters Curaçao, Dolphin Academy Curaçao / Curaçao Sea Aquarium, Samurai Curaçao, Mermaid Boat Trips / Miss Ann Boat Trips / Irie Tours, FBTT Travel, Z Air i Rumba Tours Curaçao.
