WILLEMSTAD- 6 di desèmber 2025 – Resientemente, Kòrsou a selebrá yegada di e buelo inougural di American Airlines for di Chicago, un konekshon nobo pa Kòrsou. American Airlines ta un partner importante pa Kòrsou ofresiendo ya kaba buelonan for di Miami i Charlotte. E buelo for di Chicago lo keda efektuá riba djasabra. Chicago ta un hub importante pa American Airlines ku ta ofresé e oportunidat pa konektá ku mas siudat den Merka. E buelo nobo for di Chicago ta kuadra ku Kòrsou su metanan stratégiko pa sigui ekspandé den Merka dunando turistanan for di diferente siudat e oportunidat pa bin eksperensiá nos playanan bunita, kultura vibrante, kushina riku i nos hendenan amabel. Alabes e ruta nobo di American Airlines ta nifiká mas opshon di biahe pa nos pueblo lokal.
Turistanan for di Chicago awor por skapa e friu i bin disfrutá di Kòrsou su bon wer henter aña. Na mes momentu e konekshon aki ta nifiká kresementu turístiko, oportunidat pa negoshi i interkambio kultural. Durante e seremonia a hiba palabra, Minister di Maneho di Gobernashon, Planifikashon i Servisio Públiko, Kimberly Lew-Jen-Tai den representashon di Minister Roderick Middelhof, Nelson Cortes, General Manager Aruba, Bonaire, Curaçao, na American Airlines, Peggy Croes, SVP Aviation Market Development di Curaçao Airport Partners i di Curaçao Airport Holding, Julian Diaz de Pool, Commercial Manager. Mas aleu, Minister Lew-Jen-Tai i Hugo Clarinda, Direktor Athunto di Ofisina di Turismo di Kòrsou huntu ku demas partnernan a hasi entrega di un plakat konmemorativo na Nelson Cortes (American Airlines) komo muestra di apresio pa yegada di e buelo inougural. E plakat ta ilustrá un bunita bista di Kòrsou su Handelskade.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá American Airlines ku nan ruta nobo, Chicago – Kòrsou!
