WILLEMSTAD – 14 di novèmber 2025 –Ofisina di Turismo di Kòrsou (CTB) ta kontentu pa raporta prestashon positivo kontinuo di turismo, òktober 2025 a registrá un kresementu sólido di 15% kompará ku òktober di aña pasá. Total 61.013turista di estadia a bishitá nos pais na òktober 2025.
E prestashon di tantu region di Nort Amérika, Sur Amérika komo Europa tabata positivo. Nort Amérika a registrá un kresementu di 23%, Sur Amérika a krese ku 16% i Europa a krese ku 12% kompará ku òktober 2024. Region di Karibe a konosé un bahada di 5%. Europa ta keda e merkado for di kua Kòrsou a risibí mas tantu turista registrando un total di 26.576 turista di estadia, siguí pa Nort Amérika ku 17.554 i Sur Amérika ku 12.918 turista di estadía. Informashon kolektá for di e karchinan di Imigrashon ta mustra ku turistanan a keda un averahe di 8.0 anochi riba nos pais na luna di òktober.
Prestashon tòp 3 merkadonan na luna di òktober 2025:
Hulanda: Kòrsou a risibí 22.128 turista for di Hulanda na òktober 2025, reflehando un oumento di 10% kompará ku òktober 2024. Turistanan hulandes a keda un promedio di 10.9 anochi durante nan bishita.
Estádos Unídos: For di Estádos Unídos un total di 15.315 turista a keda risibí na òktober. Esaki ta un oumento di 22% kompará ku e mesun temporada na aña pasá. Turistanan prosedente di Estádos Unídos a keda un promedio di 5.6 anochi riba Kòrsou.
Colombia: Turistanan prosedente di Colombia a subi ku15% na òktober 2025, yegando na un total di 4.497 turista kompará ku òktober 2024. Bishitantenan prosedente di Colombia a pasa un promedio di 5.1 anochi na Kòrsou.
Puntonan ku a resaltá di yanüari te ku òktober 2025
Kòrsou su industria di turismo a mustra un kresementu kontinuo di yanüari te ku òktober 2025 yegando na un total di 1.324.557 turista. E total aki ta inkluí 642.157 turista di estadia, 37.027 day trippers i645.373 turista krusero, esaki ta reflehá un kresementu di 9% kompará ku e mesun periodo na aña 2024.
Te ku òktober, turismo di estadia a krese ku 13%. E sifranan aki, ta konfirmá e interes kontinuo pa Kòrsou komo un di e destinashonnan preferí den Karibe.
