WILLEMSTAD – 5 di yüni 2025 – Miss Universe 2024, Victoria Kjaer Theilvig a yega Kòrsou! Kòrsou ta e promé pais den Karibe ku Miss Universe 2024 ta bishitá komo parti di e Miss Universe Global Tour organisá pa Miss Universe Organization. Pa selebrá e momentu grandi aki, Ofisina di Turismo di Kòrsou (CTB) den estrecho kolaborashon ku Curaçao Beauty Pageant Committee a organisá un resepshon di Bon Biní pa Miss Universe 2024. E resepshon a konta ku palabranan di bon biní di Minister di Desaroyo Ekonómiko, sr. Charles Cooper i direktor di CTB, sr. Muryad di Bruin. Durante e resepshon, Minister Cooper a entregá Miss Universe 2024, Victoria Kjaer Theilvig un bunita kuadro di artista lokal Deidre Polonius kual ta duna un impreshon artístiko di Miss Universe 2024 pará riba nos Brùg Emma atmirando nos kolorido Handelskade.
Komo parti di e bishita, CTB a hinka un programa spesial den otro pa e dianan ku Miss Universe 2024 lo ta na Kòrsou pa asina e por eksperensiá nos bunita isla, purba nos kushina krioyo i topa nos hendenan lokal. E programa ta inkluí entre otro, un tour den e área históriko di Punda, kana bai saka potrèt na e Curaçao sign bou di ritmo di brass band kompañá pa personanan den trahe di Karnaval. Tambe e lo bishitá Kas di Pal’i Maishi pa haña un eksperensiá outéntiko di Kòrsou su herensia kultural. Mas aleu e lo bai sera konosí ku nos bida bou di laman vibrante ku ta rondoná nos isla. Un momentu spesial den e programa lo ta e bishita ku Miss Universe 2024 lo bai hasi serka e muchanan na Ronald McDonald House Charities Curaçao Foundation pa entrega regalo.
Pa klousurá e bishita na Kòrsou, Miss Universe 2024, Victoria Kjaer Theilvig lo ta djasabra awor invitado di honor na e sertámen di Miss Universe Curaçao 2025. Sigui e plataformanan digital di CTB pa tuma nota di tur e momentunan spesial di e bishita di Miss Universe 2024 na Kòrsou.
