E material ta konsistí di videonan interaktivo, buki di guia i buki di tarea
WILLEMSTAD – 20 di mei 2025 – Resientemente, Ofisina di Turismo di Kòrsou (CTB) a introdusí turismo komo materia pa skol di fundeshi grupo 6 i skol spesial. E material lo yuda amplia e muchanan su konosementu riba e importansia di turismo pa nos pais. E material ta konsistí di un seri di video edukashonal di turismo, buki di guia pa maestro i buki di tarea pa alumno. Na 2022, CTB a inisiá e trayekto di introdukshon di turismo komo materia pa skol di fundeshi kaminda a start ku grupo 5. Durante e 3 añanan tras di lomba a hasi tambe evaluashon di e material bou di skolnan, kual a resultá hopi positivo. Tambe e resultadonan a yuda ku puntonan di mehorashon pa na momentu di desaroyá e material pa grupo 6 i skol spesial. E seremonia di lansamentu a tuma lugá riba e barku Freewinds i a konta ku spich di Minister di Desaroyo Ekonómiko, sr. Charles Cooper, Minister di Enseñansa, Siensia, Kultura i Deporte sr. Sithree van Heydoorn i direktor di CTB, sr. Muryad di Bruin.
E material pa grupo 6 i skol spesial ta konsistí di e siguiente temanan: trabounan den industria di turismo, importansia di tene Kòrsou limpi, merkadeo, kultura i turismo i un rekapitulashon di e material di grupo 5. Na e seremonia tabata presente e maestronan di grupo 6 i skol spesial ku próksimamente lo bai traha ku e materialnan, direktivanan di skol, representantenan di Ministerio di Enseñansa, Ministerio di Desaroyo Ekonómiko, e aktornan di e videonan edukashonal, e komishon ku a skibi e material, e tim di produkshon i partnernan den industria di turismo ku a kontribuí na realisashon di e material. Na komienso di aña eskolar nobo CTB lo organisá workshopnan pa maestronan di grupo 6 i skol spesial por familiarisá nan mes ku e material. Tambe lo hasi repartishon di e pakete di material pa tur skol.
CTB ta gradisí tur ku a kontribuí na realisashon di e trayekto aki, partikularmente Ministerio di Enseñansa, e diferente direktivanan di skol i partnernan den industria di turismo.
