WILLEMSTAD – 21 di sèptèmber 2026 – Ofisina di Turismo di Kòrsou (CTB) den estrecho kolaborashon ku Curaçao Ports Authority (CPA) a organisá e di dos edishon di Shore to Ship Symposium & Workshop. E simposio di dos dia a inisiá dia 21 di sèptèmber bou di e tema Where Experience Creates Impact. E evento a reuní 95 partisipante, inkluyendo profeshonalnan ku ta traha direktamente ku e bishitante krusero. Lidernan regional tambe a partisipá na e simposio komo oradó, kompartiendo nan eksperensia i perspektivanan riba kon mehorá e eksperensia di e bishitante krusero por krea mas balor pa Kòrsou i pa e industria krusero den Karibe en general. E oradó prinsipal, sra. Dona Regis-Prosper, Sekretario General i CEO di Caribbean Tourism Organization (CTO), a trata e tópiko The Future Cruise Guest: Expectations, Experiences & Destination Value. Durante apertura di e simposio, direktor di CTB, sr. Muryad de Bruin, tambe a hiba palabra i a resaltá e importansia di kolaborashon pa sigui mehorá e eksperensia di bishitantenan krusero.
Den su diskurso prinsipal sra. Regis-Prosper (CTO), a elaborá riba e espektativanan di e biahero krusero di awendia i a presentá tres pilar klave pa futuro di turismo krusero na Kòrsou: tene e eksperensia di e bishitante simpel, hasié inolvidabel i sigurá ku e ta reflehá e identidat outéntiko di Kòrsou. Mas aleu, e programa a kontinuá ku un pènel di eksperto ku a reuní perspektivanan for di sektor di turismo, haf i industria krusero di Kòrsou, Aruba i St. Maarten. E panelistanan a representá Port St. Maarten Group, Aruba Ports Authority, Curaçao Ports Authority, Taber Tours/Fun Bini i CTB.
E di dos parti di e dia a inkluí 2 workshop guiá pa Aquila Center for Cruise Excellence, ku partisipashon di entre otro, guianan turístiko, shofùrnan, kompanianan di eskurshon i representantenan di atrakshonnan turístiko. E workshop Mastering Challenges in Guest Experiences a brinda e partisipantenan métodonan práktiko pa atendé situashonnan difísil. Miéntras e workshop Diversity & Inclusion in Guest Experience a enfoká riba komprondé e nesesidatnan di e bishitante di awendia. E di tres workshop, The Art of Storytelling’, lo tuma lugá su siguiente dia i lo enfoká riba e arte di konta historia, pa asina krea un konekshon mas fuerte ku e bishitante i hasi nan eksperensia na Kòrsou mas inolvidabel. E partisipantenan lo risibí un sertifikado rekonosé pa Aquila Center for Cruise Excellence.
