WILLEMSTAD – 11 di sèptèmber 2026 – Ofisina di Turismo di Kòrsou (CTB) huntu ku Aruba Tourism Authority (ATA), a organisá un roadshow di kuater dia na Alemania kual a atraé un total di 125 agente di biahe. E roadshow a tuma lugá na Bonn, Essen, Münster i Hannover, siudatnan ku den e lunanan resien a generá un kantidat konsistente di bishitante pa tur dos destinashon. Meta di e roadshow tabata pa kapitalisá riba e popularidat kresiente di Kòrsou na Alemania despues di FIFA World CUP, hasi uso di e konekshon direkto nobo di Corendon Airlines konektando Düsseldorf i Kòrsou i na mes momentu resaltá e sentido fuerte di union i kolaborashon entre e dos islanan.
Na yegada, e agentenan di biahe a keda risibí ku un kòktel refreskante promé ku nan a partisipá na un merkado di biahe kaminda nan a haña informashon serka hotèlnan di tantu Aruba komo Kòrsou. Esaki a duna e agentenan di biahe e oportunidat pa interaktuá ku e partnernan hotelero i keda informá di e portafolio di e respektivo hotèlnan. Despues a sigui presentashonnan ku a resaltá e atrakshonnan úniko, kultura i eksperensianan turístiko di tur dos isla. Tambe e partisipantenan a risibí presentashon di KLM Royal Dutch Airlines i Hyatt Inclusive Collection. Ademas e roadshow a inkluí un workshop kreativo bou di guia di artista arubano Claire-Lune van Arneman i artista kreativo di Kòrsou, Gregory Isidora. E partisipantenan a disfrutá tambe di kòktelnan di Kòrsou, pasapalunan delisioso i un ambiente outéntiko ku a trese e kalor, koló i hospitalidat di e islanan dilanti.
CTB ta gradisí e partnernan di sektor privá di tantu Aruba komo Kòrsou ku a forma parti di e roadshow i kontribuí na su éksito: KLM Royal Dutch Airlines, Hyatt Inclusive Collection, Joia Aruba by Iberostar, Renaissance Wind Creek Curaçao Resort, Acoya Curaçao Resort, Villas & Spa, TUI Blue Curaçao, Amsterdam Manor, De Palm Tours Aruba, The Pyrmont Curaçao, Curaçao Marriott Beach Resort, Sandals Royal Curaçao, Courtyard by Marriott i Bucuti & Tara Beach Resort.
