WILLEMSTAD – 17 di yüni 2026 –Ofisina di Turismo di Kòrsou (CTB) huntu ku operador di tour na Alemania, Meiers Weltreisen a invitá 50 agente di biahe aleman huntu ku 33 miembro di nan famia i amigunan pa djòin un Watch Party na Munich, Alemania pa selebráe promé partisipashon di Kòrsou den Kopa Mundial di FIFA. Dos ora promé ku e partido inisiá, e agentenan di biahe a keda risibí ku un kòktel di Blue Curaçao den e área eksklusivo di Kòrsou. Aki nan a risibí informashon aktualisá di e produkto turístiko ku Kòrsou ta ofresé i a disfrutá di un bufèt promé ku bai wak e partido pafó den airu liber. Na mes momentu tabatin un stènt di Kòrsou kaminda fanátikonan aleman por a haña informashon di Kòrsou, material di promoshon i tambe artíkulonan pa apoyá e ekipo di Kòrsou.
Despues di e partido, e invitadonan a keda invitá pa disfrutá di un seshon kaminda por a purba diferente tipo di ròm i sigui disfrutá huntu di e anochi. Tambe CTB a duna entrevista na München.tv pa kompartí e emoshon durante e evento i duna un reflekshon riba e momento memorabel pa Kòrsou ku e promé gol durante Kopa Mundial. E evento aki tabata otro oportunidat kaminda CTB a kapitalisá riba e atenshon internashonal generá pa Kòrsou su debut den Kopa Mundial pa sigui hasi promoshon pa Kòrsou den e merkado aleman.
