WILLEMSTAD – 12 di yüni 2026 –Pa selebráe promé partisipashon di Kòrsou na Kopa Mundial di FIFA, Ofisina di Turismo di Kòrsou (CTB) a invitá vários prensa internashonal pa ta presente na Kòrsou. E meta ta pa laga prensa internashonal haña un eksperensiá direkto di e entusiasmo i orguyo nashonal generá pa e klasifikashon di Kòrsou na Kopa Mundial di FIFA, miéntras ku ta pone enfoke riba e produkto turístiko ku Kòrsou ta ofresé. Ta trata di kanalnan di televishon, emisoranan di radio, publikashonnan físiko i digital, revistanan di deporte, plataformanan di media online, timnan di produkshon di programanan deportivo i tambe influencers.
Vários representante di prensa internashonal lo tei pa kubri e diferente Blue Wave Watch Parties planifiká riba 14, 20 i 25 di yüni, kual ta e fechanan di Kòrsou su promé 3 partisipashonnan na Mundial. Entre e prensanan konfirmá tin, The Times (Inglatera, ku oudiensia internashonal), ARD (Alemania), FHM, Men’s Health, Manners i Metro (Hulanda) i tambe Power FM (Aruba). Nan reportahe lo enfoká riba e atmósfera rondó di e partisipashon históriko di Kòrsou den Mundial 2026 i e selebrashon ku ta tumando lugá riba henter e pais.
Anteriormente, representantenan di ESPN Brasil, Placar (Brasil), TeleAruba, 24Ora i XFM (Aruba), Guardian Media Ltd (Trinidad) i OneNil i FRSHMN kual ta e tim di produkshon di Ajax (Hulanda) a bin eksperensiá e training habrí i e partido amistoso entre Aruba i Kòrsou. E promé grupo di prensa a eksperensiá e apertura di Blue Nation i e sendementu di lusnan blou den sentro di siudat. Ta trata di Vandaag Inside, De Oranje Zomer, podcast di Kieft, Jansen, Egmond i van der Gijp, AD, NOS, Voetbal Internationals (Hulanda), ZDF, Pro7 Galileo (Alemania), La Nación (Argentina) i tambe influencers di Chile i Perú.
Pa medio di e bishitanan aki di prensa internashonal, CTB ta kapitalisá riba e atenshon internashonal generá pa Kòrsou su debut den Kopa Mundial i asina eksponé Kòrsou su kultura úniko, atrakshonnan i hospitalidat.
