pa komunidat lokal i turistanan
WILLEMSTAD – 17 di aprel 2026 – E baño públiko bou di viadùkt Otrobanda a habri su portanan bèk pa komunidat di Kòrsou i turistanan. Despues di un periodo di inaktividat, Ofisina di Turismo di Kòrsou (CTB) den estrecho kolaborashon ku Sosiedat di Komersiantenan di Otrobanda (SKO) a hasi e trabounan di mantenshon nesesario pa por a habri e baño públiko bèk. E baño públiko ta habrí di djaluna pa djasabra di 9:00 AM pa 7:00 PM i riba dianan di fiesta, ora tin aktividat den Otrobanda i riba dianan ku tin barku krusero.
Di e forma aki CTB ta kontribuí na brinda fasilidatnan di baño públiko den nos sentro di siudat dunando un kontribushon na un Otrobanda limpi i higiéniko. Pa hasi uso di e bañonan mester hasi un kontribushon di 1 florin Karibense / 1 dòler. Na e apertura tabata presente CTB huntu ku representantenan di SKO i Kaya Kaya. CTB ta hasi un apelashon na usuarionan pa yuda mantené e bañonan limpi.
