WILLEMSTAD – 15 di aprel 2026 –Ofisina di Turismo di Kòrsou (CTB) ta raportá ku sifranan di turismo di estadia na luna di mart ta mustra un prestashon stabil, reflehando kresementu kontinuo for di e merkadonan prinsipal. Durante mart, un total di 79.763 turista di estadia a keda risibí, representando un kresementu di 10% kompará ku mart aña pasá.
E datonan di e profil di bishitante ta indiká ku mayoria turista di estadia a bini pa vakashon (90%), miéntras un kantidat mas chikí a bini pa bishitá famia i konosínan (3%) i pa propósitonan di negoshi (3%). E averahe ku e turista a keda Kòrsou a keda stabil na 7.8 anochi pa persona. E tipo di biahenan aki ta sostené un embolbimentu konsistente ku negoshinan lokal, inkluyendo akomodashonnan, restorantnan, servisionan di transporte i operadornan di tour.
Prestashon tòp 3 merkadonan na luna di mart2026
Estádos Unídos: Estádos Unídos a registrá mas tantu turista di estadia na luna di mart kompará ku Hulanda. Un total di 24.043 turista prosedente di Estádos Unídos a keda risibí, representando 9% kresementu kompará ku e mesun periodo na aña pasá. Turistanan prosedente di Estádos Unídos a keda un promedio di 5.7 anochi na Kòrsou, indikando un interes konsistente pa Kòrsou. Den término di akomodashon, 65% di turistanan merikano a skohe pa resort hotels, i 35% a opta pa otro opshon di akomodashon.
Hulanda: Kòrsou a risibí 21.385 turista for di Hulanda, reflehando un bahada di 5% kompará ku 22.477 turista di estadia na luna di mart 2025. Mayoria turista hulandes (53%) a opta pa un otro opshon di akomodashon ku no ta resort, miéntras 47% a skohe pa un resort hotel. Turistanan hulandes a keda un promedio di 11 anochi durante nan bishita. E bahada den kantidat di turista hulandes mester keda mirá den un konteksto mas amplio di e prestashon general di merkado Europeo. Tur 3 aerolínea Europeo ku ta bula Kòrsou, a registrá kresementu durante luna di mart, i e merkado aleman a mustra un oumento fuerte di 93%. Mirando ku tur dos merkado ta usa e mesun aeropuerto (travel gateway), esaki ta indiká un kambio den e distribushon di merkado di orígen enbes di un redukshon den e demanda total for di Europa.
Canada: Kòrsou a risibí 8.400 turista for di Canada, reflehando un kresementu di 40% kompará ku luna di mart 2025. Kanadesnan a keda un promedio di 7.8 anochi na mart, i 57% a skohe pa hospedá na resort hotels.
Monitoreo kontinuo
E resultadonan di mart ta konsistente ku e espektativanan. CTB lo sigui monitòr aktivamente e prestashon di turismo i e indikadó ‘komportashon di e bishitante’, ku un enfoke riba mantené un aserkamentu balansá i dirigí riba duna balor, sosteniendo negoshinan lokal, miéntras ta tene kuenta ku e kalidat di bida di e habitantenan i e kapasidat general di e pais.
