WILLEMSTAD – 1 di febrüari 2024 – E aña aki sr. Francisco Albini i sra. Maria del Carmen Flix a kumpli 38 aña bishitando nos dushi pais Kòrsou. E pareha ta prosedente di Buenos Aires, Argentina. For di aña 1986 e pareha ta skohe fielmente pa tur aña pasa nan vakashon aki na Kòrsou. Pa e okashon spesial aki e pareha a risibí un bishita di Minister di Desaroyo Ekonómiko, sr. Ruisandro Cijntje i sr. Muryad de Bruin, Counterpart Director di Ofisina di Turismo di Kòrsou (CTB). E meta tabata pa duna rekonosementu i mustra apresio pa nan lealtat i laga nan sinti nan mes balorá dor di Kòrsou.
Minister Cijntje i sr. de Bruin a hiba un kombersashon ameno ku e pareha turista pa tende kon nan ta eksperensiá nos pais, kiko ta loke mas nan gusta i pa gradisí nan pa tur e añanan ku nan ta bishitando Kòrsou. E pareha a indiká ku e loke mas nan gusta ta e trankilidat ku Kòrsou ta brinda den komparashon ku Buenos Aires for di unda nan ta prosedente, tambe nan gusta nos hendenan amabel i nos playanan. Minister Cijntje a entregá e pareha un plakat di rekonosementu ku den fondo un bunita bista di nos haf, parti di Otrobanda i dos barku krusero mará na nos Mega Pier.
sr. Francisco Albini i sra. Maria del Carmen Flix ta nos embahadornan, konstantemente nan ta konta otronan di nan dushi eksperensianan na Kòrsou i asina enkurashá mas argentino pa bin bishitá nos pais.
