WILLEMSTAD- 26 di òktober 2023 – Resientemente Ofisina di Turismo di Kòrsou (CTB) kompañá pa 12 hotèl lokal a organisá e evento ‘A taste of Curaçao’,un sena kombiná ku presentashon pa un grupo di 50 agente di biahe na Hulanda. Meta di e evento tabata pa duna e agentenan di biahe un update di Kòrsou i di e produkto ku diferente di e hotèlnan lokal ta ofresé. E evento a tuma lugá na e restorant Mondi West na Amsterdam di konosido chef-kok yu di Kòrsou, Justin Niessen.
Na yegada, e agentenan di biahe tabatin e oportunidat pa di forma informal sera konosí ku otro i ku e tim di Kòrsou. Seguidamente kada hotèl a duna un presentashon informativo di e komodidatnan, servisionan i e tipo di kambernan ku nan tin pa ofresé pa hasi kada huéspet su estadia konfortabel i plasentero. Ku e informashon risibí e agentenan di biahe por informá nan klientenan mihó di tur e produktonan ku e diferente hotèlnan ta ofresé. E menú pa e sena a konsistí di diferente kuminda típiko di Kòrsou. Despues di preparashon di e sena e kòki tambe a djòin e evento pero komo DJ. A konkluí e evento ku un rifa kaminda e agentenan di biahe por a gana bòter reusabel i tambe estadia i trep di spònser pa algun di e hotèlnan presente.
CTB ta gradisí tur e partnernan ku a forma parti di e evento, kualnan ta: Blue Bay Curaçao Golf & Beach Resort, Courtyard by Marriott, Acoya Curaçao Resort, Villas & Spa, LionsDive Beach Resort Curaçao, Curaçao Marriott Beach Resort, Zoëtry Curaçao, Resort & Spa, Sunscape Curaçao Resort, Spa & Casino, Dreams Curaçao Resort, Spa & Casino, Renaissance Wind Creek Curaçao Resort, Scuba Lodge Ocean Front Boutique Hotel Curaçao, Morena Resort Janthiel Beach Curaçao, Mangrove Beach Corendon Curaçao Resort, Curio by Hilton i e kompania Join the Pipe na Hulanda ku a ofresé e bòternan reusable pa e rifa.
