WILLEMSTAD- 19 di aprel 2023 – Resientemente Ofisina di Turismo di Kòrsou (CTB) a firma un akuerdo di patrosinio ku Curaçao Little League Foundation. E akuerdo ta enserá ku pa un periodo di 3 aña CTB lo duna e fundashon un aporte finansiero pa por yuda kubri gastunan di partisipashon na kampeonatonan internashonal. E “exposure” ku nos ta haña kada biaha ku nos hóbennan bai representá Kòrsou den kampeonatonan di Little League ta impagabel. Mesora riba curacao.com ta mira un oumento den e kantidat di bishitantenan for di eksterior ku ta subi pa buska mas informashon di nos destinashon. Firmamentu di e akuerdo menshoná ta forma parti di CTB su strategia di promoshon di Kòrsou komo destinashon turístiko pa medio di deporte.
E akuerdo a keda firmá pa sr. Hugo Clarinda, direktor athunto di CTB i sr. Urny Floran, District Administrator di Curaçao Little League Foundation E firmamentu di e akuerdo a tuma lugá den presensia di Minister di Desaroyo Ekonómiko, sr. Ruisandro Cijntje. Di akuerdo ku Minister Ruisandro Cijntje, “E aporte finansiero aki ta pa yuda garantisá Curaçao Little League Foundation su partisipashon na kampeonatonan di Little League internashonal”.
CTB ku sosten di Gobièrnu di Kòrsou ta sigui ku su strategia di promové turismo pa medio di deporte.
