WILLEMSTAD- 17 di mart 2023 – Resientemente un delegashon di Kòrsou tabata presente na e di 42 edishon di ‘Vitrina Turistica ANATO’. E feria turístiko ANATO a tuma lugá na Bogotá, Colombia. Meta di Kòrsou su partisipashon na e feria di 3 dia tabata pa estrechá lasonan komersial i presentá na agentenan di biahe i mayoristanan tur loke Kòrsou tin pa ofresé komo destinashon turístiko. E tim di Kòrsou a konsistí di Minister di Desaroyo Ekonómiko, sr. Ruisandro Cijntje, representantenan di MEO, Ofisina di Turismo di Kòrsou (CTB), Curaçao Airport Partners (CAP) i diferente hotèl i operador di tour.
Un biaha mas ANATO a brinda e plataforma ideal pa promové nos pais ku produkto i paketenan diseñá spesialmente pa kumpli ku e interes di biaheronan kolombiano. E aña aki tambe e stènt di Kòrsou a resaltá dunando un bista di e edifisionan kolorido di nos sentro di siudat Willemstad. Pa krea un ambiente lokal tabatin un kuarteto prosedente di Kòrsou ku a sòru pa entretené tur ku a bishitá nos stènt ku dushi músika di nos pais. Mas aleu, e tim di Kòrsou a duna informashon referente apertura di diferente hotèl nobo i plannan di renobashon di hotèlnan eksistente. Tambe e tim a hasi uso di e oportunidat pa reuní ku diferente di e aerolíneanan ku ta konektá Colombia ku Kòrsou.
E dianan promé ku e feria a inisiá, CTB a organisá diferente evento pa fortifiká e lasonan di trabou ku agentenan di biahe. E eventonan aki a tuma lugá na Medellin, Cali, Bucaramanga i Villa de Leyva i a konta ku partisipashon di 1350 agente di biahe. Durante di e eventonan, e hotèlnan i operadornan di tour di Kòrsou a presentá nan paketenan atraktivo pa atraé futuro bishitantenan.
CTB ta gradisí tur e partnernan di sektor privá ku a forma parti di e tim di Kòrsou: Acoya Curaçao Resort Villas & Spa, Avila Beach Hotel, Corendon Mangrove Beach Resort, Curaçao Marriott Beach Resort, Courtyard by Marriott Curaçao, Zoëtry Curaçao Resort & Spa, Dreams Curaçao Resort Spa & Casino, Sunscape Curaçao Resort Spa & Casino, Kontiki Beach Resort Curaçao, Kunuku Resort All Inclusive Curaçao, LionsDive Beach Resort Curaçao, Papagayo Beach & Resort, Renaissance Wind Creek Curacao Resort, Sandals Royal Curaçao, Fiesta Tours, Rumba Turismo B.V. i Curaçao Vacation Tours.
