WILLEMSTAD- 24 di febrüari 2023 – Resientemente Ofisina di Turismo di Kòrsou (CTB) huntu ku 7 partner di sektor privá a partisipá na otro edishon di New York Travel & Adventure Show. E feria di mas grandi di Estádos Unídos dirigí riba públiko general a tuma lugá na Jacob K. Javits Convention Center na New York. Durante dos dia e tim di Kòrsou a presentá e produkto úniko ku Kòrsou tin di ofresé. Riba e promé dia agentenan di biahe tambe a bishitá e feria pa haña mas informashon di destinashonnan eksitante, manera Kòrsou!
Tur ku a bishitá e stènt di Kòrsou a haña informashon tokante nos isla, variedat di akomodashon i nos atrakshonnan turístiko. Komo parti di e stènt di Kòrsou a inkluí un repliká di e mural na Scharloo di artista visual yu di Kòrsou, sr. Francis Sling. Durante di e feria, Francis tabata presente i a pinta riba e réplika hasiendo e totalidat ainda mas bunita. Di e manera aki a laga e bishitantenan sera konosí tambe ku un di e hopi talentonan di nos isla.
Tambe huntu ku nos agensia publisitario na Merka, Diamond PR i Ofisina di Turismo di Boneiru a organisá un sena spesialmente pa agentenan di biahe. E sena a tuma lugá na Manhattan. Akinan kokínan di Kòrsou a presentá nos kushina lokal i a kompartí nos isla su historia riku hasiendo uso di diferente plato lokal. Tambe a organisá un di dos sena pa agentenan di biahe kual a tuma lugá na Westchester County. E sena a keda organisá pa CTB huntu ku nos agensia di representashon The Muse Collection. Durante di e sena, CTB huntu ku e hotèlnan partisipante a duna informashon di Kòrsou i e hotèlnan.
CTB ta gradisí partnernan di sektor privá, Acoya Curaçao Resort, Villas & Spa, , Curaçao Marriott Beach Resort, Coral Estate Luxury Resort, LionsDive Beach Resort Curaçao, Papagayo Hotel & Resort, Renaissance Wind Creek Curaçao Resort i AMR Collection Hotels konsistiendo di Dreams Curaçao Resort, Spa & Casino, Sunscape Curaçao Resort, Spa & Casino, Zoëtry Curaçao Resort & Spa pa nan partisipashon. Bou di tur ku a bishitá e stènt di Kòrsou lo rifa un biahe i estadia pa Kòrsou. E show a resultá un biaha mas un oportunidat fantástiko pa promové Kòrsou!
