WILLEMSTAD – 31 di yanüari 2023 – Resientemente a tuma lugá e tradishonal evento di gala dirigí riba mundu di biahe ku ta keda anualmente organisá pa TRAVel Media publikadó di Travelpro i Travmagazine. Durante e evento, e industria di biahe ta bini huntu pa wak bèk riba e aña tras di lomba pero tambe ta wak futuro pa identifiká oportunidatnan ku por presentá. Despues di un stòp na 2020, e aña aki dilanti un públiko di sigur 500 invitado e evento a tuma lugá atrobe inkluyendo entrega di e prestigioso Vakantie Awards. Vakantie Awards ta keda konsiderá komo e Oscars di mundu di biahe na Hulanda konsistiendo di 26 kategoria. E aña aki Ofisina di Turismo di Kòrsou (CTB) su kantor na Hulanda a kai den premio ganando e Vakantie Awards 2023 den e kategoria ‘Verkeersbureau’ esta Ofisina di Informashon pa Turista.
Kòrsou hopi biaha na Hulanda ta destaká komo un destinashon popular pa vakashon pero e biaha aki ta e tim di CTB na Hulanda a risibí un rekonosementu pa e trabounan desplegá. “Nos ta kontentu ku e muestra aki di rekonosementu i konfiansa for di e industria di turismo. Esaki ta e promé premio ku ta keda otorgá den 3 aña kual ta hasié mas spesial ainda. E premio aki ta sigur un motivashon pa nos sigui traha duru pa mustra tur loke Kòrsou tin pa ofresé na e biahero hulandes”, sigun sr. Muryad di Bruin, Counterpart Director di CTB.
Riba e página travmagazine.nl por mira tur e otro premionan ku a keda otorgá.
