WILLEMSTAD- 19 di yanüari 2023 – Ofisina di Turismo di Kòrsou (CTB) kompañá pa diferente partner den sektor privá tabata presente na Vakantiebeurs 2023. Na entrada parti pafó e biaha aki CTB a pone un trùk’i pan den kolónan vibrante kaminda tur bishitante por a pasa i purba nos pika bal i pan ku stobá. Esaki sigur a hala hopi atenshon di bishitantenan na e feria. E feria turístiko di 5 dia a inisiá ku un kongreso di biahe riba e promé dia i e di dos dia tabata dirigí riba agentenan di biahe, prensa i komersiantenan. E tres último dianan di e feria tabata habrí pa e konsumidó ku ta bishitá e feria spesialmente pa haña inspirashon pa nan próksimo biahe. E stènt di Kòrsou a konta e aña aki ku partisipashon di 25 representante di entre otro hotèlnan i diferente skol di buseo.
E tim di Kòrsou tabata kla prepará pa informá tur bishitante di paketenan di biaha atraktivo, nos kalendario di evento i nos atrakshonnan. Den e stènt tabatin pantayanan grandi ku bista 360 di nos dushi Kòrsou. Loke sigur a hala hopi atenshon na e stènt di Kòrsou tabata e mini Karnaval ku personanan den trahenan di Karnaval huntu ku un brassband. Bishitantenan na nos stènt por a sinti di e manera aki un tiki di nos Karnaval. E stènt di Kòrsou ta keda semper bai un di esnan mas popular, i nos pais un di e destinashonnan faborito den Vakantiebeurs.
CTB ta gradisí partnernan di sektor privá ku e aña aki a forma parti di e tim di Kòrsou; Blue Bay Curaçao Golf & Beach Resort, Casa Amalia, Morena Eco Resort, Coral Estate Luxury Resort, Curaçao Marriott Beach Resort, DeLynne Resort Curaçao, Courtyard by Marriott, Dolphin Academy Curaçao, Dolphin Suites & Wellness Curaçao, Kontiki Beach Resort Curaçao, Kura Botanica Hotel, Landhuis Chobolobo, Miss Ann Boat Trip N.V., Papagayo Beach Resort, Renaissance Wind Creek Curaçao, Scuba Lodge, CASHA, Travel to Curaçao, FBTT, Boutique Hotel ‘t Klooster, BOHO Boutique Hotel, Lions Dive Beach Resort, Avila Beach Hotel, Acoya Curaçao Resort Villas & Spa, Scuba Do i BlueFinn Charters Curaçao.
Vakantiebeurs 2023, e feria mas grandi pa biaheronan hulandes a resultá un biaha mas e plataforma ideal pa promové Kòrsou komo e destinashon turístiko number unu den Karibe.
