WILLEMSTAD – 13 di yanüari 2023 – Ofisina di Turismo di Kòrsou (CTB), Asosiashon di Músiko i Artista di Kòrsou (AMAK) i Fundashon Desaroyo Karnaval Kòrsou (FDKK) a tene un rueda di prensa pa asina informá komunidat di Aruba di Festival di Tumba 2023 i tur loke Kòrsou tin di ofresé durante e dushi temporada di Karnaval.
Festival di Tumba i sigur e anochi final semper ta un atrakshon pa nos bishitantenan di Aruba, esaki ta konta tambe pa e marcha di despedida riba djamars anochi. Durante e rueda di prensa, representantenan di AMAK a duna tur informashon di loke por spera durante e edishon 51 di Festival di Tumba. E popular kantantenan Rodrick ‘Rocco’ Franken, Chendell Beaumont, Jair ‘Buddy’ Vesprey, Jurick Salomón i e agrupashon musikal Buleria di Aruba ku lo partisipá na Festival di Tumba 2023 na Kòrsou tambe a forma parti di e rueda di prensa.
Ademas di e rueda di prensa e tim di CTB a tene un media tour pa asina duna mas informashon na e komunidat di Aruba di tur loke por spera durante Festival di Tumba 2023 i e temporada di Karnaval aki na Kòrsou. Kòrsou kompletu ta kla pa disfrutá di e temporada di Karnaval i pa yama tur bishitante bon bini.
