WILLEMSTAD – 14 di novèmber 2022 – Ofisina di Turismo di Kòrsou (CTB) ta raportá ku Kòrsou a risibí un total di 400.576 turista di estadia durante e promé 10 lunanan di aña 2022 kual ta un kantidat di 19.586 turista di estadia adishonal kompará ku e mesun periodo na 2019. Na 2019 e kantidat registrá durante e mesun periodo tabata 380.990. E rekuperashon di e prestashon promé ku pandemia ta kontinuá sigun nos ta yegando fin di aña. Faltando solamente 2 luna pa 2022 terminá, CTB ta proyektá ku gran satisfakshon ku Kòrsou lo alkansá un kantidat rèkòrt di turista di estadia si e situashonnan aktual permanesé. Sifranan ku CTB a raportá anteriormente tabata un kantidat di 467.538 na 2015 i 463.684 na 2019.
Prestashon òktober 2022
CTB ta raportá un kantidat di 44.914 turista di estadia pa luna di òktober. Ku e kantidat aki, luna di òktober 2022 ta e di dos luna den e aña aki ku e mihó prestashon. E luna ku e mihó prestashon te na e momentunan aki ta luna di yüli na momentu ku nos a risibí 48.246 turista di estadia. Ora kompará e sifranan di òktober 2022 ku òktober 2019 por mira ku un kantidat di 10.388 turista di estadia adishonal a keda risibí e aña aki. Kòrsou ta sigui konta ku un tremendo prestashon di e 3 merkadonan prinsipal esta; Hulanda, Estádos Unídos i Colombia. E 3 merkadonan aki huntu ta responsabel pa 71% di tur turista di estadia ku a bishitá Kòrsou durante òktober 2022. E repartishon entre e 3 merkadonan ta di e siguiente manera: Hulanda 44.8%, Estádos Unídos 20.4% i Colombia 5.8. Un kantidat di 63% di tur e turistanan ku a bishitá Kòrsou a skohe un ‘resort hotel’ (esta hotèl grandi, chikí i bùngalo) komo akomodashon. Miéntras 37% a keda den un akomodashon alternativo. Un averahe di 8.6 anochi pa bishitante a keda registrá na luna di òktober.
Europa ta keda e region mas fuerte pa Kòrsou. Na òktober, un kantidat di 23.992 turista di estadia a bishitá Kòrsou for di Europa. Esaki ta 53.4% di e kantidat total di turista di estadia ku a bishitá nos pais. For di Hulanda un kantidat di 20.102 turista a keda risibí, esaki ta 128% rekuperashon kompará ku e kantidat di turista risibí na òktober 2019 na momentu ku 15.708 turista Hulandes a keda risibí. Otro merkadonan sekundario den region di Europa tambe a presta bon. Un kantidat di 1.391 turista di estadia a keda risibí for di Alemania i 905 for di Bèlgika.
For di e region di Nort Amérika un kantidat di 10.696 turista a bishitá Kòrsou na òktober representando 23.8% di e kantidat total di turista di estadia. Di e kantidat aki, un total di 9.166 a bini for di Estádos Unídos na òktober 2022. Na òktober 2019, un kantidat di solamente 4,040 turista merikano a keda risibí. Miéntras e demanda fuerte for di Estádos Unídos ta kontinuá, CTB ta kontentu pa raportá un prestashon positivo for di merkado kanades awor ku Air Canada i WestJet a reanudá nan servisio pa Kòrsou. Un kantidat di 1.530 kanades a bishitá Kòrsou na òktober 2022 miéntras e kantidat registrá na òktober 2019 tabata 853.
For di region di Sur Amérika un total di 5.990 turista di estadia a bishitá Kòrsou. Di e turistanan for di Sur Amérika, 2.601 tabata prosedente di Colombia. E rekuperashon di e merkado di Colombia ta 121%. Na òktober 2019 un kantidat di 2.152 turista a keda risibí. Un total di 902 turista di estadia tabata prosedente di Brazil na òktober 2022. For di region Karibe un total di 3.075 turista di estadia a keda risibí na òktober. Mayoria di e turistanan aki ta prosedente di e paisnan di Karibe Hulandes.
Na luna di òktober un total di 14 barku krusero a bishitá nos pais ku un total di 36.819 turista krusero.
