Home / Press Releases / National Association of Black Scuba Divers (NABS) ta hasi donashon na Kolegio San Hosé na Barber

WILLEMSTAD- 10 di novèmber 2022 – National Association of Black Scuba Divers (NABS) ta un organisashon merikano di sambuyadó, ku entre otro ta biaha bai diferente pais pa sambuyá. E aña akí nan a bolbe skohe Kòrsou pa bin sambuyá i tambe a disidí pa tene nan Kumbre Anual aki na Kòrsou. Komo parti di nan biahenan nan tin e kustumber di semper duna bèk na e komunidat kaminda nan ta di bishita. Den e kaso di Kòrsou nan a skohe pa hasi donashon na un skol, i ku asistensia di Ofisina di Turismo di Kòrsou (CTB) nan a entregá un chèk na Kolegio San Hosé na Barber.

E fondonan akí lo ser usá pa kubri gastu di materialnan ku e skol tin nesesidat di dje. Maestronan i alumnonan di e skol a keda mashá enkantá i agradesido pa e donashon i a indiká ku esaki lo ser usá na benefisio di desaroyo di e muchanan. CTB ta kontentu di por a fasilitá e proseso pa e donashon tuma lugá, i tambe ta apresiá mashá ku NABS a hasi e bunita gesto akí na Kolegio San Hosé. Alabes CTB ta sumamente agradesido ku NABS a skohe Kòrsou komo nan destinashon pa sambuyá i tambe pa tene nan Kumbre Anual e aña akí.

Tourism summit: The impact of tourism on the economy of Curaçao
National Association of Black Scuba Divers (NABS) donates to Kolegio San Hosé at Barber