Home / Press Releases / ‘Rethinking Tourism’ tema sentral di Dia Mundial di Turismo 2022

WILLEMSTAD- 26 di sèptèmber 2022 – Dia Mundial di Turismo ta keda konmemorá tur aña riba dia 27 di sèptèmber i tin komo ophetivo pa promové e importansia di turismo i su balor sosial, kultural i ekonómiko. Tema sentral e aña aki ta ‘Rethinking Tourism’, esta ku no por bai bèk na maneranan di funshoná di pasado pero ku mester para ketu na kon ta hasi turismo i unda ke bai ku turismo. Pa Ofisina di Turismo di Kòrsou (CTB) e tema aki ta sumamente importante. Huntu ku demas aktornan den e industria di turismo nos mester reflekshoná i determiná kon Kòrsou ke sigui bai dilanti ku turismo pa asina logra benefisio pa nos komunidat.

Den su mensahe ofisial den kuadro di e tema di Dia Mundial di Turismo 2022, e Sekretario General di UNWTO (United Nations World Tourism Organization) sr. Zurab Pololikashvili a indiká: “sigun ku mundu ta habriendo bèk, nos mester siña e lèsnan for di e pandemia i e pousa den biahe internashonal asosiá na esaki. E krísis a eksponé puntonan ménos fuerte i a mustra unda nos mester krese pa bira mas resiliente. Tambe e krísis a mustra kamindanan ku tin desigualdat i unda mester aktua di manera mas hustu”.

‘Rethinking Tourism’ ta nifiká entre otro pa Kòrsou ku nos mester stipulá huntu kon ta bai atendé ku e retonan ku ta biniendo dilanti pa e industria di turismo. Turismo di Kòrsou ta desaroyando den bon direkshon. Den e promé 8 lunanan di aña nos pais a registrá mas turista di estadia kompará ku e mesun periodo na aña 2019, esta promé ku pandemia. Otro punto positivo ta e ampliashon di e portafolio di akomodashon riba nos pais ku nos ta eksperensiando na e momentu aki. Tur esaki ta rekerí atenshon i inovashon prinsipalmente den e área di desaroyo di produkto, rekurso humano i transporte. Algun ehèmpel ta: mester krea mas tipo di atrakshon turístiko pa e turista ku ta bishitá nos pais, mester di trahadó riba diferente nivel pa okupá e funshonnan ku ta habriendo den e industria di turismo i lo mester diskutí tambe ampliashon di e kantidat di lisensia pa taksi i tour bus. CTB lo sigui den kombersashon ku partnernan den sektor públiko i privá ku e meta pa yega na solushonnan práktiko na benefisio di e industria di turismo.

Curaçao promoted as golf destination during two major golf tournaments in Germany
‘Rethinking Tourism’, central theme of World Tourism Day 2022