Home / Press Releases / Kòrsou promové komo destinashon di gòlf durante dos gran torneo di gòlf na Alemania

WILLEMSTAD- 22 di sèptèmber 2022 – Resientemente, Ofisina di Turismo di Kòrsou (CTB) a patrosiná e prestigioso torneonan di gòlf, PROject GOLFworld ProAm i VPV Bad Wörishofen Open, den e estado di Bavaria na Alemania. Mas ku 140 profeshonal  i hungadó amatùr di gòlf a partisipá na e dos eventonan akí kombiná, durante kual Kòrsou a keda presentá na nan komo destinashon di gòlf.

CTB tabata presente na tur dos evento ku un tim ku a promové nos isla ku un bar di kòktel, brindando un variedat di kòktel trahá ku Blue Curaçao, i tambe a ofresé awa di lamunchi. Ademas a brinda oportunidat pa purba ròm den un ‘lounge area’ ku tabata den e tema Kòrsou. Tambe a rifa dos estadia di 5 dia na dos hotèl lokal pa 2 persona ku desayuno inkluí. Esakinan a bai komo premio na dos hungadó di gòlf durante un evento na e klup di gòlf Bad Wörishofen.

E aña akí Kòrsou ta e ‘destination partner’ ofisial di e Asosiashon Profeshonal di Gòlf di Bavaria (PGA Bavaria), i partner patrosinadó di “Race to Curaçao”. Esaki ta un seri di torneo di 9 evento di gòlf na Bavaria, kual lo resultá den e torneo final, esta e Blue Bay International ProAm, ku lo tuma lugá aki na Kòrsou di 13 pa 20 di novèmber próksimo.

Christoph Günther di PGA Bavaria ta kontentu i ansioso pa e torneo benidero na Kòrsou i ta bisa, “E Blue Bay International ProAm tabata den nos mente pa basta tempu, pasobra nos tabata hunga ántes den Curaçao Masters den un formato di ProAm, pero e evento ei a stòp basta aña pasá. Nos ta mashá kontentu di trese gòlf profeshonal bèk na e bunita isla akí den Karibe, i nos ta kere ku di e manera aki nos por sostené Kòrsou pa e krese bira un destinashon internashonal di gòlf.”

CTB ta mashá gradesido na PGA Bavaria pa e gran oportunidat akí pa “showcase” nos isla komo un destinashon di gòlf na hungadónan profeshonal i amatùr di golf. Meskos, CTB ta ekstendé su gratitut tambe na Avila Beach Hotel i Papagayo Beach Hotel pa nan sosten komo patrosinadó.

August 2022 achieved 10% increase of the pre-pandemic arrivals of August 2019
Curaçao promoted as golf destination during two major golf tournaments in Germany