Área di rekreashon Zakito aksesibel pa aktividatnan sosial

September 14, 2022

WILLEMSTAD- 14 di sèptèmber 2022 – Resientemente Ofisina di Turismo di Kòrsou (CTB) a renobá área di rekreashon Zakito, konosí komo Koredor. E área aki diariamente ta ser usá pa vários grupo i persona individual pa deporte, ehersisio, i aktividatnan sosial. Despues di renobashon e área ta konsistí awor di diferente palapa, 2 stashon pa BBQ, un área ku diferente aparato pa hasi ehersisio den airu liber i un área pa mucha hunga. CTB ta enkargá tambe ku supervishon, mantenshon i limpiesa di e área. Ademas a apuntá un ‘beheerder’ pa atendé ku kualke situashon riba e áreanan pa asina por sigurá un mihó eksperensia pa tur usuario.

Entrante 15 di sèptèmber 2022 tur persona ku ta interesá pa organisá un aktividat na un di e áreanan kaminda tin palapa i e stashonnan pa BBQ mester hasi un petishon via www.zakito.net. Esaki ta pa por struktura tur petishon i pa por tin un mihó kontròl riba aktividatnan ku ta tuma lugá riba e diferente áreanan.

E fondonan pa finansiamentu di área di rekreashon Zakito ta keda fasilitá pa Ministerio pa Desaroyo Ekonómiko (MEO). CTB ta enkurashá nos komunidat pa sigui hasi uso di e área pa moveshon físiko i aktividatnan sosial i pa yuda mantené e área limpi i bunita.

Most recent