Kòrsou visibel den Champions League den e temporada benidero tambe

August 22, 2022

WILLEMSTAD- 22 di ougùstùs, 2022 – Ajax i Kòrsou a duna nan kolaborashon un èkstra impulso. Kòrsou ta Partner Ofisial for di 2020, i ta entre otro prominentemente visibel riba manga di ünifòrm di Ajax durante kompetensianan hulandes. For di temporada pasá ta permití pa tin un logo riba manga durante kompetensianan europeo tambe, i p’e motibu akí Kòrsou tabata visibel den e temporada anterior durante tur partido ku Ajax a hunga den Champions League tambe. P’e temporada di 22-23 e akuerdo akí a keda alargá i atrobe Kòrsou lo aparesé riba manga durante tur partido ofisial ku Ajax hunga na Europa.

Menno Geelen, direktor komersial di Ajax: “Temporada pasá Ajax 1 a klousurá e temporada na Kòrsou. Durante e bishita akí e hungadónan di Ajax a disfrutá di e isla i nan a sòru pa hopi kara kontentu dor di nan bishita na diferente skol i proyekto. Banda di esei nos por a laga tur nos siguidónan mira kon bunita Kòrsou ta. Esei nos lo sigui hasi meskos den e temporada benidero. Ku e nòmber riba manga den Champions League, Kòrsou ta keda visibel tambe p’e fanátikonan internashonal di Ajax i di futbòl en general.”


Muryad de Bruin, counterpart director di Ofisina di Turismo di Kòrsou: “Nos ta ansioso pa un temporada nobo di Champions League ku e logo di Kòrsou riba manga di e kamisa di ünifòrm. Den e temporada anterior nos a mira kon grandi e alkanse internashonal di Champions League ta. E partidonan ta ser transmití den hopi pais ku ta mashá importante pa Kòrsou. Nos ta kontentu ku pa medio di e kolaborashon internashonal akí ku Ajax, den e temporada benidero nos lo ta visibel atrobe den e paisnan akí.”

Most recent