Promé fase programa di training pa laborá den sektor di turismo a start

August 4, 2022

WILLEMSTAD- 4 di ougùstùs 2022 – Resientemente Ofisina di Turismo di Kòrsou (CTB) den estrecho koperashon ku Ministerio di Desaroyo Ekonómiko (MEO) i Ministerio di Desaroyo Sosial, Labor i Bienestar (SOAW) a tene 3 dia di registrashon pa personanan interesá pa sigui kursonan pa laborá den sektor di turismo. Mas di 600 persona a inskribí pa partisipá na e kursonan. E promé fase di e programa di training a start 3 di ougùstùs ku e promé grupo di kursistanan. E fase aki ta pa atkerí e abilidatnan nesesario pa por laborá den sektor di turismo.

E promé fase ta konsistí di e siguiente seshonnan: motivashon, aktitut, servisio na kliente, integridat i responsabilidat. Ta trata aki di tópikonan ku ta importante i aplikabel pa e diferente funshonnan den sektor di turismo. E training lo ta unu intensivo i práktiko. Despues di un partisipashon aktivo i asistensia 100% na e seshonnan, e kursista ta risibí su sertifikado. Tambe e kursistanan lo haña seshonnan di informashon na enkargo di CTB kaminda lo trata diferente tópiko relashoná ku e industria di turismo manera entre otro; merkadeo, e produkto turístiko, invershon den sektor di turismo i sifranan di turismo. Den e di dos fase di e programa lo start ku e diferente kursonan kual e personanan a apliká pe, ta trata di: kokí, weiter, bartènder, housekeeping, resepshonista, guia turístiko i kurso di masashi.

E programa di training  ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta enkargá ku ehekushon di e programa. E programa ta keda ehekutá den estrecho kolaborashon ku Ministerio di Desaroyo Sosial, Labor i Bienestar (SOAW), Ministerio di Enseñansa (OWCS) i partnernan den sektor privá.

Most recent