WILLEMSTAD- 28 di yüli 2022 – Resientemente, a promové nos pais Kòrsou durante e prestigioso torneo di gòlf “Wouwse Pro-Am” na Hulanda. Durante tur e dianan di e torneo e lokashon tabata dediká na e tema Kòrsou. E aña aki Ofisina di Turismo di Kòrsou (CTB) ta poniendo mas enfoke riba e segmento di gòlf, presentando nos kanchanan di gòlf na e segmento ‘high-end’ i tambe na medionan di komunikashon ku ta dirigí riba deporte. Esaki ku e meta pa atraé mas hungadó di gòlf tantu profeshonal komo amatùr i tambe amantenan di e deporte di gòlf pa bin bishitá nos pais.
Riba tur e 3 dianan di e torneo “Wouwse Pro-Am”, CTB tabatin un stènt kaminda e hungadónan por a saka potrèt ku imágennan di Kòrsou i refreská ku awa di lamunchi, bòter di awa òf dal un shòt di ròm di Kòrsou. Un di e dianan di e torneo tabata titulá ‘Curaçao Day’, i nos propio profeshonal di gòlf di Kòrsou, Jane Weststrate, a guia un tim ku a representá Kòrsou partisipando na e torneo, miéntras e mes tambe a kompetí den e torneo profeshonal di hende muhé.
Na final di e torneo, dos hungadó amatùr a gana pasashi pa bin Kòrsou, inkluso estadia i partisipashon na e di kuater torneo anual di gòlf na Kòrsou ku lo tuma lugá na novèmber próksimo. Banda di esaki, e ganadó di e premio di tómbola tambe a risibí pasashi pa Kòrsou, inkluyendo estadia i un ‘golf pass’ pa por hunga riba e tres kanchanan di gòlf na Kòrsou. CTB ta gradisí Avila Beach Hotel i Renaissance Wind Creek Curaçao Resort pa nan kontribushon na e premionan.
