Tim Kòrsou su futbolistanan for di Europa tambe tei
WILLEMSTAD- 17 di mei 2022 – Djamars 17 di mei e selekshon diAFC Ajax a yega Kòrsou. Djis algun dia despues di a konkistá e título di kampion di Eredivisie na Hulanda pa di 36 biaha. AFC Ajax ta na Kòrsou te ku 21 di mei 2022 pa partisipá na un programa kargá ku diferente aktividat di karakter sosial manera klínika di futbòl pa hóben, bishita na skolnan, seminario pa coachnan i staf i bishita na algun instansia deportivo. E bishita lo konkluí ku un partido amistoso entre AFC Ajax i Tim Kòrsou.
Durante di un konferensia di prensa riba dia ku e tim a yega Kòrsou, CTB huntu ku AFC Ajax, Tim Kòrsou i Call To Action Management (CTAM) a duna informashon referente e delaster detayenan relashoná ku e programa di AFC Ajax su bishita na Kòrsou i e partido amistoso. E partido amistoso entre AFC Ajax i Tim Kòrsou lo ta djabièrnè awor 20 di mei pa 8or di anochi na stadion Ergilio Hato (SDK). Tim Kòrsou ta formá pa futbolistanan profeshonal na Europa ku roots na Kòrsou huntu ku hungadónan di e ekipo kampion di Kòrsou, Jong Holland. E futbolistanan profeshonal for di Europa ku ta forma parti di Tim Kòrsou tambe a yega Kòrsou entretantu.
CTB huntu ku demas partnernan ta invitá pueblo di Kòrsou kompletu pa tei presente pa mira e gran partido amistoso entre AFC Ajax i Tim Kòrsou.
