esta promé ku pandemia
WILLEMSTAD- 12 di mei 2022 – Ofisina di Turismo di Kòrsou (CTB) ta raportá un kantidat di 42.715 turista di estadia pa luna di aprel. Ku e kantidat di turista di estadia aki, luna di aprel 2022 a yega na 106% di e kantidat registrá na aprel 2019 esta promé ku pandemia. Na aprel 2019 un total di 40.289 turista di estadia a bishitá Kòrsou. Aprel ta e di dos luna kaminda e kantidat di turista registrá a surpasá e kantidat ku a bishitá nos pais e mesun luna pero promé ku pandemia. Òktober 2021 tabata e promé luna ku a registrá mihó prestashon kompará ku e temporada promé ku pandemia. Di e 42.715 turistanan risibí, un total di 61% a bini for di Europa, 17% a bini for di Nort Amérika, 13% for di Sur Amérika, 6% for di Karibe i 2% for di sobrá paisnan di mundu. Pa dia, un kantidat di 1.423 turista di estadia a keda risibí. Huntu e turistanan risibí na luna di aprel a keda un total di 393.329 anochi riba Kòrsou.
For di Hulanda nos a risibí 21.379 turista, kual ta 32% mas ku na luna di aprel 2019 esta promé ku pandemia. For di Bèlgika, 1.430 bishitante a keda risibí miéntras for di Alemania 1.298 bishitante a keda risibí. E kantidat di turistanan di estadia for di Bèlgika tambe a surpasá e kantidat registrá na aprel 2019 levemente. Na aprel 2019 un kantidat di 1.383 turista a bishitá nos for di Bèlgika. Di e turistanan europeo, 58% a keda den un ‘resort hotel’ (esta hotèl grandi, chikí i bùngalo) na luna di aprel.
Turista di Estadia for di Estádos Unídos tambe a surpasá e kantidat registrá na aprel 2019. For di Estádos Unídos un kantidat di 6.611 turista a keda risibí na luna di aprel. Miéntras na aprel 2019 un kantidat di 6.213 a keda risibí kual ta 6% mas. Pa loke ta trata Canada, e total di turista risibí na aprel 2022 tabata 774. Pues total nos a risibí 7.385 turista for di Nort Amérika. Di e turistanan prosedente di Nort Amérika 71% a keda den un ‘resort hotel’.
For di region di Sur Amérika un total di 5.735 turista a keda risibí. Di e turistanan aki un total di 2.782 esta 49% ta prosedente di Colombia. Miéntras 816 esta 14% a bishitá nos for di Brazil. For di Sürnam 672 turista a keda risibí kual ta 12%. Un total di 57% di tur e bishitantenan prosedente di Sur Amérika a keda den un ‘resort hotel’. For di region Karibe, Kòrsou a risibí 2.543 turista di estadia na aprel, primordialmente for di e paisnan di Karibe Hulandes.
Na luna di aprel un total di 21 barku krusero a bishitá nos pais ku un total di 27.886 turista krusero.
Sifranan yanüari te ku aprel 2022
Total Kòrsou a registrá 154 mil turista di estadia for di yanüari te ku aprel 2022. For di Europa un total di 102 mil turista a keda risibí. For di Nort i Sur Amérika e kantidat registrá tabata respektivamente 26 mil i 16 mil turista. Nos paisnan bisiña den Karibe a sòru pa 6 mil turista den e periodo menshoná. Aktualmente Kòrsou ta risibiendo por lo ménos 5.5 biaha mas turista di estadia kompará ku aña pasá. Aña pasá e mesun temporada Kòrsou a risibí 27.500 turista. E progreso pa yega bèk na e nivel di prestashon promé ku pandemia ta kanando den bon direkshon. Den e promé kuater lunanan di aña nos a yega na 92% di e kantidat registrá durante e promé kuater lunanan di 2019 na momentu ku Kòrsou a risibí 167 mil turista di estadia.
