Komo parti di e “Quick Win Plan” pa desaroyo di e área
WILLEMSTAD- 15 di òktober 2021 – Den un ambiente ameno a tuma lugá presentashon ofisial di e mural na Zakito. E evento a konta ku presensia di Minister di Desaroyo Ekonómiko, sr. Ruisandro Cijntje i Minister di Tráfiko, Transporte i Planifikashon Urbano, sr. Charles Cooper. E mural ta forma parti di e “Quick Win Plan” pa desaroyo di e área di Zakito i ta un di e puntonan di akshon di e vishon pa desaroyo di e área manera akordá pa Gobièrnu di Kòrsou. E “Quick Win Plan” tin komo meta pa desaroyá e área di Zakito hasiendo diferente mehorashon chikitu ku ta hisa balor di e área i hasié mas atraktivo pa rekreá i hasi deporte lokual lo yuda enkurashá e aspekto di ‘wellness’ bou di komunidat. Ehekushon di e “Quick Win Plan” ta den man di Ofisina di Turismo di Kòrsou (CTB). E artista ku a pinta e mural ta Sander van Beusekom di BLEND Creative Imaging. Durante di e evento sr. van Beusekom a duna splikashon di e kreashon artístiko i a bai den detaye riba e nifikashon di e idea tras di e mural.
E mural ta konsistí di 3 sekshon di 45 meter kada un. E promé sekshon ta ekspresá un kaluroso bon bini na e bishitantenan na e área di Koredor i na mes momentu ta ekspresá e importansia pa tene nos bida bou di laman limpi. E di dos ta ekspresá e historia di produkshon di awa kual a inisiá na 1928 dor di Aqualectra kombiná ku e historia di piskamentu kual te ku awe ta forma parti di e área di Koredor. E di tres sekshon ta enfoká riba e importansia di ‘wellness’ i deporte pa kual e área aki ta hopi konosí. E artista van Beusekom a traha huntu ku e kompania PickNic Projects kual a envolví tambe personanan for di mas di 10 diferente bario ku tambe a yuda ku pintamentu di e mural.
Ku finalisashon di e mural, Koredor ta bira un área mas agradabel, kontribuyendo asin’aki na e eksperensia di tantu e poblashon lokal komo nos turistanan na momentu ku nan ta di bishita na e área aki. Un danki spesial ta bai na Gerensia di Aqualectra ku a yuda ku drechamentu di e muraya pa hasi e pintamentu di e mural posibel. CTB ta invitá nos komunidat pa bishitá e área i asina atmirá e mural pero tambe hasi uso di e área pa rekreá. Ora ta bishitá e área ban yuda tambe pa tene esaki limpi. Huntu nos por!
