Home / Press Releases / Inisio pintamentu di mural komo parti ehekushon Quick Win Plan Zakito

WILLEMSTAD – 12 di mart 2021 – Resientemente Minister di Desaroyo Ekonómiko Dr. Steven Martina huntu ku sra. Zita Jesus-Leito, MBA Minister di Tráfiko, Transporte i Planifikashon Urbano i di Salubridat Públiko, Medio Ambiente i Naturalesa a duna inisio na pintamentu di e mural riba e muraya di Aqualectra na entrada di Koredor. E mural ta forma parti di ehekushon di e “Quick Win Plan” pa desaroyo di e área di Zakito i lo kubri tres sekshon di kada unu mas o ménos 45 meter. E artista enkargá ku pintamentu di e mural ta sr. Sander van Beusekom di BLEND Creative Imaging. Huntu ku e kompania PickNic Projects lo envolví tambe personanan for di nos komunidat pa partisipá den e proyekto. E “Quick Win Plan” ta un di e puntonan di akshon di e vishon pa desaroyo di e área di Zakito kual a keda akordá na desèmber 2018 dor di Konseho di Minister. Na inisio di 2020, Gobièrnu di Kòrsou i Ofisina di Turismo di Kòrsou (CTB) a firma un akuerdo pa ehekushon di e “Quick Win Plan”.

E “Quick Win Plan” tin komo meta pa desaroyá e área di Zakito hasiendo diferente mehorashon chikitu ku ta hisa balor di e área i hasié mas atraktivo pa rekreá i hasi deporte lokual lo yuda enkurashá e aspekto di ‘wellness’ bou di komunidat. Na mes momentu e mehorashonnan lo sirbi pa generá mas interes di posibel invershonistanan i otro ‘stakeholders’ pa partisipá den e desaroyo di e área. Komo parti di e plan aki ya kaba a drecha entre otro diferente palapa, parti di dos edifisio, diferente elemento na Parke Lucha pa Libertat i a limpia e área. Ta trahando pa implementá diferente otro “quick wins” den e área. Un danki spesial ta bai na Gerensia di Aqualectra ku a yuda ku drechamentu di e muraya pa asina hasi e pintamentu di e mural posibel.

February stayover visitors’ performance
Mural Started in Execution of the Zakito Quick Win Plan