Home / Press Releases / CTB i partnernan lokal a partisipá na Duikvaker Virtual Expo 2021

WILLEMSTAD- 18 di febrüari 2021 – Resientemente Ofisina di Turismo di Kòrsou (CTB) huntu ku 17 partner lokal a partisipá na e vershon virtual di e feria di buseo Duikvaker. E feria virtual dirigí riba buseo i snòrkel a konta e aña aki ku un total di 100 ekshibidor i oradornan prosedente di rònt mundu kual a haña e oportunidat pa presentá nan produkto i servisio na e konsumidó europeo. Durante e dos dianan di e Duikvaker Virtual Expo 2021 e página a risibí un total di 76.281 views.

E tim di Kòrsou a keda bon representá pa vários operador di buseo, hotèlnan i apartamentunan ku a eksponé tur loke Kòrsou tin pa ofresé na tur ku gusta sambuyá i snòrkel.E bishitantenan na e feria virtual por a sigui presentashonnan ku informashon aktualisá di Kòrsou su produkto turístiko, papia ‘live’ ku representantenan di CTB, partnernan den e sektor di akomodashon i operadornan di buseo. Tur esnan ku sambuyá òf snòrkel den awanan di Kòrsou ta keda altamente impreshoná ku e bunitesa di kada sitio bou di awa. Kada un ta úniko i tin su propio beyesa i variashon di koló. Esaki ta e sentimentu ku CTB i su partnernan a sa di traspasá na tur ku a bishitá e stèntnan virtual di e tim di Kòrsou. E página di e feria lo keda disponibel te ku luna di sèptèmber próksimo di manera ku personanan rònt mundu ainda tin chèns di bishitá e stèntenan virtual pa asina wak e presentashonnan i chèk e foldernan digital.

CTB ta gradisí e 17 partnernan di sektor privá ku a forma parti di e tim di Kòrsou na e feria di buseo. E feria virtual di Duikvaker ta sigur un plataforma mas pa por sigui promové Kòrsou bou di e amantenan di buseo na Europa.

January stayover visitors’ performance
CTB and Local Partners at Duikvaker Virtual Expo 2021