Home / Press Releases / Turismo di Estadia na luna di yanüari

WILLEMSTAD- 12 di febrüari 2021Ofisina di Turismo di Kòrsou (CTB) ta raportá un kantidat di 5.790 turista di estadia pa luna di yanüari. E motibu di e kaida den kantidat di turista di estadia na luna di yanüari por keda relashoná direktamente ku e konseho di biahe negativo anunsiá pa Gobièrnu Hulandes na komienso di desèmber último, na momentu ku a pone Kòrsou riba kódigo oraño. E desishon aki ta sigui tin un impakto negativo riba e kantidat di bishitantenan ku nos ta risibí for di nos merkado number unu, esta Hulanda.

Na luna di yanüari, Kòrsou a risibí 3.170 turista for di Hulanda kual ta 83% ménos ku e kantidat risibí na yanüari 2020. For di Alemania, un kantidat di 191 turista a keda risibí. Na luna di yanüari, solamente 31% di e turistanan prosedente for di Europa a keda den un ‘resort hotel’ (esta hotèl chikí, grandi i bùngalo). Durante e lunanan anterior 55% a keda den un ‘resort hotel’, pues esaki tambe ta un di e konsekuensianan mas di e konseho di biahe negativo.

For di Estádos Unídos un kantidat di 739 turista a keda risibí na luna di yanüari. Un total di 121 turista a bishitá nos for di Canada i for di e region di Sur Amérika un total di 342 turista a keda risibí. Un total di 57% di e bishitantenan risibí for di Sur Amérika ta prosedente di Colombia. For di region Karibe, Kòrsou a risibí 456 turista di estadia na yanüari, primordialmente for di e islanan den Reino Hulandes.

CEO di CTB, Paul Pennicook a remarká, “E situashon rondó di Corona vírùs aki na Kòrsou ta mehorando di forma stabil. E kantidat di kasonan nobo diario ta bastante abou i e kasonan aktivo ta ménos ku 100. Gobièrnu di Kòrsou i tur otro sektor den e industria ta trahando duru pa mantené e situashon ku ta mehorando i na mes momentu ta den kombersashon kontinuo ku Gobièrnu Hulandes pa logra ku ta pone Kòrsou bèk riba kódigo hel mas pronto posibel”.

December stayover visitors’ performance
January stayover visitors’ performance