Home / Press Releases / CTB a interaktuá ku potensial bishitantenan na Sürnam durante un Virtual InfoMart

WILLEMSTAD- 19 di òktober 2020 – Resientemente Ofisina di Turismo di Kòrsou (CTB) den estrecho koperashon ku Ministerio di Desaroyo Ekonómiko a organisá e di 7 edishon di  ‘Curaçao InfoMart’ dirigí riba Sürnam. Pa motibu di e pandemia, a tene e evento di e aña aki di forma virtual. Konsumidónan, agentenan di biahe, operadornan di tour, doñonan di negoshi i personanan ku gusta biaha a keda invitá pa bishitá e marshe virtual i haña informashon di tur loke Kòrsou tin di ofresé. Miéntras kompanianan establesé na Sürnam por a konektá ku Kòrsou i sera lasonan komersial ku nos empresarionan lokal.

E vershon virtual a konta ku partisipashon di 44 partner for di sektor turístiko manera entre otro hotèlnan, apartamentunan, atrakshonnan turístiko i operadornan di tour. Ademas 20 kompania a partisipá na e mishon komersial for di entre otro sektor di IT, konstrukshon, merkadeo i komunikashon e sektor kreativo, Free Zone i diferente mas. Banda di e partnernan di Kòrsou tambe e marshe a konta ku partisipashon di aerolíneanan i operadornan di tour di Sürnam. “E momentu ku a tene e InfoMart tabata perfekto konsiderando ku e restrikshon di biahe pa bishitantenan for di Sürnam ta keda kitá entrante awe, 19 di òktober,” asina sr. Paul Pennicook CEO di CTB a remarká.

Durante e 3 dianan, e konsumidó na Sürnam a eksperensiá Kòrsou pa medio di video i imágennan visual atraktivo presentá pa CTB. Sentenar di konsumidó a bishitá e evento virtual durante e 3 dianan. Tur partisipante a risibí un anochi grátis na un di e akomodashonnan partisipante. Konsumidónan i kompanianan por a bishitá e diferente stèntnan virtual pa interkambiá i hasi pregunta tokante e produktonan i servisionan ku e tim di Kòrsou ta ofresé.

CTB i MEO ta gradisí tur partner lokal pa nan partisipashon na e di 7 edishon di e ‘Curaçao InfoMart’ ku e aña aki tabata di forma virtual. E marshe virtual sigur a kontribuí pa por sigui promové Kòrsou komo destinashon turístiko i na mes momento traha riba sera lasonan komersial na benefisio di desaroyo ekonómiko di nos pais.

Stayover visitors gradually increasing
CTB engages potential travelers in Suriname in an innovative Virtual InfoMart