Turista di Estadia oumentando gradualmente

October 7, 2020

Sifranan preliminar sèptèmber 2020
WILLEMSTAD- 6 di òktober 2020 – Ofisina di Turismo di Kòrsou (CTB) ta raportá un kresementu stabil den kantidat di turista di estadia desde ku a kita e restrikshon pa ku entrada na Kòrsou for di sierto pais dia promé di yüli último. Kòrsou a risibí 8.195 turista di estadia na luna di yüli i un total di 9.227 na ougùstùs. Na luna di sèptèmber, un total di 10.418 turista di estadia a bishitá nos pais. 91% di e kantidat di turista registrá ta prosedente di Europa.

Konsiderando ku te na e momentunan aki solamente turistanan for di algun pais primordialmente den Wèst Europa por bishitá Kòrsou, por mira ku 91% di e europeonan ku a bishitá nos ta prosedente di Hulanda. Nos a risibí 8.646 turista for di Hulanda kual ta 38% ménos kompará ku sèptèmber 2019. For di Alemania un kantidat di 359 turista aleman a keda registrá, un bahada di 79% kompará ku aña pasá. Na luna di sèptèmber, 55% di turistanan for di Europa a keda den un ‘resort hotel’ (esta hotèl chikí, grandi i bùngalo), miéntras 45% a keda den un akomodashon alternativo. Ta bon pa mira un kresementu den e kantidat di turistanan europeo ku ta keda den un ‘resort hotel’. Tambe tin un kresementu den e kantidat di turista europeo ku ta skohe pa keda den un hotèl grandi òf bùngalo. Esaki ta resultado direkto di e esfuersonan di promoshon kontinuo na Europa dor di CTB i partnernan den industria. Un otro indikadó interesante ta e kantidat averahe di anochi ku e turista europeo a keda nos pais. Na sèptèmber 2020 e averahe di anochi tabata 11.3, miéntras aña pasá e mesun luna a registrá un averahe di 9.7 anochi. Esaki ta 16% kresementu den e kantidat averahe di anochi ku turistanan for di Europa a keda riba nos pais.

Di akuerdo ku CEO di CTB, sr. Paul Pennicook, “Pa loke ta trata e 3 lunanan tras di lomba por nota ku e kantidat di turista di estadia ta kresiendo stabil, no opstante e echo ku nos ta habrí pa solamente un kantidat limitá di pais den Europa. Kòrsou ta keda un destinashon faborito pa nos merkado prinsipal. Nos meta ta pa gradualmente sigui habri pa mas merkado den e lunanan benidero”.

Most recent