WILLEMSTAD- 28 di febrüari 2020 – Resientemente Ofisina di Turismo di Kòrsou (CTB) huntu partnernan di sektor privá a partisipá na otro grandioso New York Times Travel Show. E feria mas grandi di Nort Amérika a tuma lugá na Jacob K. Javits Convention Center na New York. E aña aki a selebrá e di 17 edishon di New York Times Travel Show ku un biaha mas a resultá hopi eksitoso akaparando atenshon di mas ku 35.568 partisipante inkluyendo 11.750 for di industria komersial di biahe i otro 23.000 bishitante ku a disfrutá di mas ku 747 organisashon for di 176 pais ku a ekshibí nan destinashon i produktonan.
Durante di e feria aki bishitantenan ta haña un bista mas serka di destinashonnan doméstiko i internashonal. New York Times Travel Show ta un oportunidat perfekto pa familiarisá ku destinashonnan ku ta ofresé eksperensianan di biahe úniko, manera Kòrsou! E show a ranka sali ku e Travel Industry Conference ofresiendo un programa di training amplio, spesialmente pa agentenan di biahe i miembronan di prensa. E aña aki a enfoká riba e tema, “Focus on the Caribbean”. CTB a duna un presentashon den kual a informá miembronan di prensa i agentenan di biahe tokante di e diferente festivalnan i otro aktividatnan riba nos kalendario di evento. Despues di e konferensia a habri porta di e sala di ekshibishon pa duna inisio na New York Times Travel Show 2020.
Riba e di dos i di tres dia a habri e feria pa públiko, kaminda e tim di Kòrsou a duna tur ku a bishitá e stènt di Kòrsou informashon tokante nos isla, akomodashonnan i tur loke tin di hasi na Kòrsou i spesialmente loke ta hasi nos destinashon úniko. Klaro, tambe a promové e buelo direkto for di JFK ku Jetblue i e buelo for di Newark ku United. Tur ku a bishitá e stènt por a registrá ku chèns di gana un biahe pa Kòrsou i premionan di e hotèlnan partisipante dor di usa e ‘reality goggle’ di Kòrsou kual ta un tipo di brel ku imágen virtual ku ta duna un impreshon di nos isla.
CTB ta gradisí partnernan di sektor privá, Acoya Curaçao Resort, Villas & Spa, Avila Beach Hotel, Corendon Mangrove Beach Resort, Curaçao Marriott Beach Resort, Dreams Curaçao Resort, Spa & Casino, Kontiki Beach Resort, Livingstone Jan Thiel Resort, Oasis Coral Estate Beach, Dive & Wellness Resort, Papagayo Beach Resort, Renaissance Curaçao Resort & Casino i Suncape Curaçao Resort, Spa & Casino pa nan partisipashon. E show a resultá un oportunidat fantástiko pa promové Kòrsou!
