WILLEMSTAD- 18 di febrüari 2020 – Resientemente a tuma lugá e Caribbean Travel Marketplace na Baha Mar Convention, Arts & Entertainment Center na Nassau, Bahamas. Caribbean Travel Marketplace ta keda anualmente organisá pa Caribbean Hotel & Tourism Association (CHTA). E feria ta brinda oportunidat na proveedónan di turismo i mayoristanan di rònt mundu ku ta dirigí riba benta di biahe di vakashon den Karibe pa por konektá ku otro. E feria ta ofresé un plataforma ideal kaminda durante 2 dia proveedornan i kumpradónan ta interkambiá personalmente ku otro i asina yega na palabrashonnan ku ta benefisiá e region. Partisipashon na e feria ta entre otro pa sigurá reservashonnan ku mayoristanan, fortifiká relashonnan ku klientenan aktual, traha riba kontaktonan nobo, alsa e presensia di e destinashon i sera kontraktnan nobo.
Ofisina di Turismo di Kòrsou (CTB) konhuntamente ku Curaçao Hospitality & Tourism Association (CHATA) i Curaçao Airport Partners (CAP) a kompartí un stènt i a ehekutá 30 sita ‘one-on-one’ ku diferente partner mayorista, operadornan di tour i kompanianan di publisidat. Tambe, CTB i CHATA a kondusí un konferensia di prensa pa duna informashon na media lokal i internashonal. Den esaki a inkluí informashon aktualisá di Kòrsou su sifranan di bishitante, e produkto ku Kòrsou ta ofresé i proyektonan turístiko ku ta na kaminda.
Ku mas di 500 delegado registrá for di mas ku 170 kompania proveedor, Caribbean Travel Marketplace ta e feria mas prestigioso den su kategoria. Mas di 80 kompania kumpradó a registrá pa reunionnan inkluyendo representantenan for di Canada, Oustralia, Bahamas, Fransia, Alemania, Italia, Mexico, Panamá, Portugal, Puerto Rico, Inglatera, Merka i mas. E aña aki CHTA a introdusí un programa piloto pa inkluí un grupo di agentenan di biahe lider for di diferente siudat di Merka tambe. E asosiashon pa hotèl i turismo ta sostené 33 asosiashon nashonal di hotèl i mas ku 1,000 hotèl i nan miembronan durante di 55 aña.
Ta gradisí partnernan lokal, Corendon Mangrove Beach Hotel, Livingstone Jan Thiel Resort, AMResorts: Sunscape Curaçao Resort/Dreams Curaçao Resort, Curaçao Marriott Beach Resort, Renaissance Curaçao Resort & Casino, CAP i CHATA pa nan aporte durante e presentashon di Kòrsou na Caribbean Travel Marketplace 2020.
