E feria di konsumidó di mas grandi na Hulanda a selebrá su di 50 edishon
WILLEMSTAD- 5 di febrüari 2020 – Ofisina di Turismo di Kòrsou (CTB) kompañá pa diferente partner den sektor privá tabata presente na Vakantiebeurs 2020. E aña aki, Vakantiebeurs a selebrá su di 50 edishon. Meskos ku añanan anterior por a konta ku un gran kantidat di bishitante ku a surpasá 100.000 persona durante 5 dia. Vakantiebeurs 2020, e feria mas grandi pa e biahero hulandes a resultá un plataforma ideal pa promové Kòrsou komo destinashon turístiko den Karibe.
Gran mayoria di bishitantenan di Vakantiebeurs ta hasi uso di e oportunidat pa tuma mas tantu informashon posibel den preparashon di nan próksimo fakansi. E tim di Kòrsou tur aña di nobo tei prepará pa informá tur bishitante di e último paketenan, kalendario di evento i novedat. E plataforma di Vakantiebeurs semper a resultá perfekto pa introdusí Kòrsou òf pa kaba di inspirá e bishitante ku e fakansi di su soño ta na Kòrsou! E aña aki tambe CTB a pèrkurá pa maneranan interaktivo pa atraé bishitante na e stènt di Kòrsou. E biaha aki a sòru pa un bòrchi di grafiti digital ku arte di Francis Sling riba kual e bishitantenan por a pinta un arte hasiendo uso di fèrf di spùit digital. E pintura digital aki nan por a ‘share’ despues riba ret sosial. E stènt di Kòrsou ta keda semper bai un di esnan mas popular, i nos pais un di e destinashonnan faborito den Vakantiebeurs.
CTB ta gradisí partnernan di sektor privá ku e aña aki a forma parti di e tim di Kòrsou; Livingstone Jan Thiel Resort, Acoya Curaçao Resort Villas & Spa, Oasis Parcs, Dreams Curaçao Resort, Sunscape Curaçao Resort Spa & Casino, Dolphin Suites Curaçao, Dolphin Academy Curaçao, Kura Hulanda Village & Spa – Kura Hulanda Lodge & Beach Club, Curaçao Marriott Beach Resort, Papagayo Beach Resort, Boutique Hotel ‘t Klooster, Miss Ann Boat Trips, Curaçao Activities, Van der Valk Kontiki Beach Resort Curaçao, Scuba Lodge, CHATA, Santa Barbara Beach & Golf Resort Curaçao, Lions Dive Beach Resort, Avila Beach Hotel, Renaissance Curaçao Resort & Casino, Morena Resort, Scuba Do i Nostalgia.
