Home / Press Releases / CTB ta lansa video clip nobo di Kòrsou ta dushi

WILLEMSTAD- 24 di yanüari 2020 – Resientemente Ofisina di Turismo di Kòrsou (CTB) a lansa un video clip nobo den kuadro di su kampaña di konsientisashon ‘Kòrsou ta dushi’. Meta di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E video clip nobo di ‘Kòrsou ta dushi’ ta basá riba un kansion di e popular kantante Raichel Martina mihó konosí komo Mraizz. E video clip a keda dirigí pa e talentoso hóben Ryan ‘QD’ Navarro. Den e video clip CTB ta ilustrá diferente persona ku diariamente pa medio di entre otro nan talentonan ta saka kara di nos pais. 

E letranan di e kansion ta deskribí nos pais, nos hendenan, e importansia di traha huntu pa logra nos metanan pero tambe kon nos komo embahadornan mester ta kla pará pa yuda e turista ku a skohe pa bin bishitá nos pais. E video clip ta konta ku partisipashon di e siguiente personanan: Akisha Albert (2018 Miss Universe top 10 finalist), Serena Janet Israel Anthony (Artista), Geraldine ‘Zus’ Boelijn (Zus di Plasa, Kòki), Liana Diaoen (Atleta), Gilbert ‘Dibo’ Doran (Músiko), Hubert ‘Yubi’ Kirindongo (Artista), Alton Paas (Presidente Fundashon Alton Paas, Carel Rink (Artista), Kurt Schoop (Direktor UNU), Matthew Sophia (Atleta), Yvonne Troeman (Yvonne di Plasa, Kòki), Eric Wederfoort (Instruktor i Sambuyadó Profeshonal) i e tim di Senior League Liga Pariba (2018 Senior League World Series Champions).

Un danki ta bai na kada un ku a forma parti di e video clip nobo di ‘Kòrsou ta dushi’. Pa mas informashon di e kampaña bishitá e wèpsait www.korsoutadushi.com òf search Korsou ta dushi, riba Facebook, Instagram òf Youtube. Ban kuida nos pais i kompartié ku nos bishitantenan for di eksterior. Kòrsou ta dushi, Bib’é. Stim’é.

Tourist Massage Course Started
CTB Launching New Curaçao is “Dushi” Video Clip